বাক্সা,23 আগষ্টঃ ২০১৫ চনত শুভাৰম্ভ হোৱা 'ৰাষ্ট্ৰীয় খাদ্য সুৰক্ষা আঁচনি'ৰ ৰেচন বিতৰণ নামত বাক্সা জিলাৰ খণ্ডিগড় বহুমুখী সমাবায় সমিতি অধীনৰ দোংপাৰা গাঁৱৰ (ঔখাৰী) ৰাইজক প্ৰৱঞ্চনা কৰা বুলি গুৰুতৰ অভিযোগ কৰে হিতাধিকাৰীসকলে ।
ঘটনা অনুসৰি, দোংপাৰা(ঔখাৰী)ৰ গাঁৱৰ প্ৰায় ২৮৩ টা পৰিয়ালক স্থানীয় বহুমুখী সমবায় সমিতিৰ এজেন্ট বিজয় চন্দ্ৰ বসুমতাৰীয়ে হিতাধিকাৰীৰ দহ কিলো চাউলৰ বিপৰীতে ন কিলো চাউল দিয়ে আৰু AAYৰ কাৰ্ডৰ হিতাধিকাৰীক ৩৫ কিলো চাউলৰ বিপৰীতে ১০ কিলো দিয়ে বুলি স্থানীয় লোকসকলে অভিযোগ উত্থাপন কৰে । আনহাতে এইক্ষেত্ৰত এজেন্টগৰাকীৰ বিৰুদ্ধে প্ৰতিবাদ সাব্যস্ত কৰিলে এজেন্টগৰাকীয়ে তেওঁলোকৰ ৰেচন সম্পূৰ্ণ ৰূপে বন্ধ কৰাৰ সকিয়নী দিয়া বুলি সংবাদ মাধ্যমৰ আগত জানিবলৈ দিয়ে ।
দেওবাৰে দোংপাৰা(ঔখাৰী)গাঁৱৰ ৰাইজে স্থানীয় পুথিভঁৰালৰ প্ৰাংগনত এখন ৰাজুহুৱা সভা অনুষ্ঠিত কৰে । সভাত ৰাইজে এজেন্টগৰাকীৰ বিৰুদ্ধে কেইবাটাও গুৰুত্বপূৰ্ণ সিদ্ধান্ত গ্ৰহণ কৰে । বিগত কেইবা বছৰ ধৰি বিজয় চন্দ্ৰ বসুমতাৰীয়ে খাদ্য সুৰক্ষা আঁচনিৰ চাউল বিতৰণ নামত ৰাইজক বৃহৎ খেলিমেলি কৰাৰ অভিযোগ স্থানীয় ৰাইজে উত্থাপন কৰে ৷
উল্লেখ্য যে, ৰাইজে এইক্ষেত্ৰত কেইবাবাৰো তামুলপুৰ যোগান বিভাগৰ কাৰ্যালয়ৰ ওচৰত অভিযোগ দাখিল কৰিছিল যদিও এজেন্টগৰাকীৰ বিৰুদ্ধে কোনোধৰণৰ গুৰুত্ব প্ৰদান নকৰাৰ অভিযোগ তোলে ৰাইজে । এই ক্ষেত্ৰত এজেন্টগৰাকীয়ে যিসমূহ হিতাধিকাৰীৰ নাম Onlineত নাম সন্নিবিষ্ট কৰিবলৈ সক্ষম হয় তেওঁলোকৰ বিপৰীতেহে চাউল প্ৰদান কৰে বুলি জানিব পৰা গৈছে ।
