বাক্সা,11 এপ্ৰিলঃ বিশ্ব ত্ৰাস সৃষ্টি কৰা কৰ'ণা মহামাৰীৰ কৱলত ইতিমধ্যে সমগ্ৰ বিশ্বত লাখতকৈ অধিক লোকে মৃত্যুক আঁকোৱালি ল'বলগীয়া হৈছে । দেশতো প্ৰধানমন্ত্ৰী নৰেন্দ্ৰ মোডীয়ে এই মাৰাত্মক কৰ'ণা ভাইৰাছক প্ৰতিৰোধ কৰিবলৈ ভাৰতত ২১ দিনীয়া লক ডাউনৰ আহ্বান জনাইছিল । যাৰ ফলত বৰ্তমান দেশত অব্যাহত আছে লক ডাউন ৷ কিন্তু দুখৰ বিষয়ে যে ইমানৰ পিছতো ৰাজ্যখনৰ একাংশ মানুহ সচেতন নহয় কৰ'ণা ভাইৰাছ সন্দৰ্ভত ৷ তেওঁলোকে এতিয়াও নাজানে কৰ'ণা ভাইৰাছ তথা লক ডাউন সম্পৰ্কে ৷
বাক্সা জিলাৰ ভাৰত ভূটান সীমান্তৰ পশ্চিম পাটকিজুলীত উপস্থিত আমাৰ সাংবাদিকে কেইবাগৰাকী লোকক লক ডাউন আৰু কৰ'ণা ভাইৰাছৰ সম্পৰ্কে কৰা প্ৰশ্নত্তোৰত কিহৰ কাৰণে বন্ধ দিছে সেয়া জ্ঞাত নহয় বুলি সদৰী কৰে । আনহাতে প্ৰথমে একাংশ লোকে কৰ'ণা ভাইৰাছক কোনোবা অচিনাকি দুৰ্বৃত্ত বুলি ভাবি লৈছিল যাৰ বাবে বিভিন্ন গাঁও সমূহৰ মূল পথত বেৰিকেট লগোৱা দেখিবলৈ পোৱা গৈছিল । এনেদৰে এতিয়াও ৰাজ্যৰ বিভিন্ন প্ৰান্তত সজাগতাৰ অভাৱ পৰিলক্ষিত হৈছে ।
