বাক্সা, 25 অক্টোবৰ: বাক্সা জিলাৰ তামুলপুৰ মহকুমাৰ নামচৰীয়া গাৱঁত ৰাইজে সাজিলে বাঁহৰ দলং । ৰাজ্য চৰকাৰে উন্নয়নৰ ঢাক-ঢোল বজাই থকাৰ সময়তে পুনৰ বিটিচি চৰকাৰৰ ফোঁপোলা স্বৰূপ উদাঙালে নামচৰীয়া গাঁৱৰ ৰাইজে । বাক্সা জিলাৰ গোৰেশ্বৰ- তামুলপুৰ -মুছলপুৰ সংযোগী পাগলদিয়া নদীৰ ওপৰত ৰাইজে সাজি উলিয়াই বাঁহৰ দলং ৷ শুকুৰবাৰে এক মাংগলিক পৰিৱেশত ভুক্তভুগী ৰাইজে শুভাৰম্ভ কৰে সাজি উলিওৱা বাঁহৰ দলংখনৰ ৷
জানিব পৰা মতে স্বাধীনোত্তৰ কালৰে পৰা নাছিল পাগলদিয়া নদীৰ ওপৰত এখনো দলং । অঞ্চলটোৰ ৰাইজে চৰকাৰ তথা জনপ্ৰতিনিধিক বাৰম্বাৰ অনুৰোধ কৰাৰ পিচতো কোনো ধৰণৰ সহাঁৰি নোপোৱাৰ ফলত ৰাইজে ৰ'দ,বৰষুণকো নেওচি দিনে নিশাই বাঁহৰ দলঙৰ নিৰ্মাণ কাৰ্য চলাই গৈছিল। অঞ্চলটোৰ লোক সকলে জানিবলৈ দিয়া মতে প্ৰায় ৪ লাখ টকা গাঠিৰ ধন ভাঙি সাজি উলিয়াইছে ২০০ মিটাৰ দীঘল বাঁহৰ দলংখন । প্ৰতি বছৰে ৰাইজে এনেদৰে বাঁহৰ দলং নিৰ্মাণ কৰি আহিছে যদিও বাৰিষাৰ সময়চোৱাত ফেনে ফুটাই বাঢ়ি অহা পানীয়ে উটুৱাই লৈ যায় ৰাইজে নিৰ্মান কৰা বাঁহৰ দলং ।
