পখিলা খেদা বয়সত হুইল চেয়াৰত বহি জীৱন কটাইছে এটি কণমানিয়ে

কমেও পাঁচৰ পৰা ছয়লাখ টকাৰ প্ৰয়োজন শিশুটিৰ চিকিৎসাৰ বাবে ৷ চাইকেলৰ মেকানিক গৌতম হালৈৰ এতিয়া উপায়হীন হৈ পৰিছে ৷ কন্যাৰ ভৱিষ্যত অন্ধকাৰ দেখি হতাশ হৈ পৰিছে পৰিয়ালটো ৷

বাক্সা , 11 মে' : এটি ফুলকুমলীয়া শিশু ৷ পখিলা খেদাৰ বয়স শিশুটিৰ ৷ নাজানে ৰঙীন পৃথিৱীখনৰ কোনো আওভাওঁ ৷ লগৰ সংগীৰ সৈতে ৰং ধেমালী কৰাৰ সময় ৷ কিন্তু হুইলচেয়াৰত বহি সময় অতিবাহিত কৰিছে শিশুটিয়ে ৷

বাক্সা জিলাৰ বেলগুৰিপথাৰ গাঁৱৰ বাসিন্দা গৌতম হালৈ আৰু অঞ্জনা হালৈৰ জীয়ৰী ৰিম্পী হালৈ ৷ জন্মৰ পাচৰে পৰা শাৰীৰিক ভাৱে অক্ষম শিশুটি ৷ ৰাজ্যৰ বিভিন্ন প্ৰান্তৰ চিকিৎসালয়ত চিকিৎসা কৰিও আৰোগ্য নোহোৱা শিশুটিৰ চিকিৎসাৰ বাবে প্ৰয়োজন অধিক ধনৰ ৷ কমেও পাঁচৰ পৰা ছয়লাখ টকাৰ প্ৰয়োজন শিশুটিৰ চিকিৎসাৰ বাবে ৷ শিশুটিৰ পিতৃ চাইকেলৰ মেকানিক গৌতম হালৈ এতিয়া উপায়হীন হৈ পৰিছে ৷ কন্যাৰ ভৱিষ্যত অন্ধকাৰ দেখি হতাশ হৈ পৰিছে পৰিয়ালটো ৷ বিগত সময়চোৱাত শিশুটিৰ চিকিৎসাৰ বাবদ শেষ হৈছে সকলো জমা ধন ৷ চৰকাৰী সাহাৰ্য অবিহনে এতিয়া অন্ধকাৰ দেখিছে পৰিয়ালটোৱে ৷ মাতৃ অঞ্জনা হালৈৰ কাতৰ অনুৰোধ চৰকাৰে সহায় কৰক তেওঁলোকক ৷