বৰমা, 2 নৱেম্বৰঃ " বদৰুদ্দিন আজমল বৃদ্ধ হৈছে , সেয়ে ভৱিষ্যতে পৃথিৱী আৰু দেশ খনত যিয়ে যেনেকৈ মৰে মৰি থাকক বুলিয়ে তেওঁ ভাৱে ৷" বাক্সাৰ দলবাৰী একলব্য কেন্দ্ৰীয় বিদ্যালয়ত উপস্থিত থাকি এই মন্তব্য ৰাজ্যসভাৰ সাংসদ বিশ্বজিৎ দৈমাৰীৰ ৷ কেৱল ৰাজনৈতিক স্বাৰ্থ সিদ্ধিৰ বাবেই বদৰুদ্দিন আজমলে চৰকাৰৰ জনসংখ্যা নীতিক বিৰোধিতা কৰিছে বুলিও নেতা গৰাকীক তীব্ৰ সমালোচনা কৰে সাংসদ গৰাকীয়ে ৷
শনিবাৰে সাংসদ গৰাকীয়ে বিটিএডিৰ অন্তৰ্গত কেন্দ্ৰীয় বিদ্যালয় খনৰ আভ্যন্তৰীণ দিশ সমূহ পৰিদৰ্শন কৰাৰ উদ্দেশ্যে বিদ্যালয় খনত উপস্থিত হয় ৷ 2013 চনতে কেন্দ্ৰীয় চৰকাৰৰ অনুদান সাপেক্ষে স্থাপিত হোৱা বিদ্যালয় খনত উন্নয়ন শূণ্য বুলি মন্তব্য কৰি সাংসদ গৰাকীয়ে কয় যে, শিক্ষক-কৰ্মচাৰী নিযুক্তি, হোষ্টেল সমূহত পৰ্যাপ্ত খাদ্য যোগানকে ধৰি আন্তগাঁথনিৰ ওপৰতো চৰকাৰে গুৰুত্ব প্ৰদান কৰাৰ প্ৰয়োজন আছে ৷ উল্লেখযোগ্য যে, জনজাতি প্ৰধান বিদ্যালয় হোৱাৰ বাবেই বিদ্যালয় খনৰ উন্নয়নৰ ক্ষেত্ৰত সকলোৱে অৱহেলা কৰি আহিছে বুলিও মন্তব্য কৰে সাংসদ গৰাকীয়ে ৷ অৱশ্যে এই ক্ষেত্ৰত বিদ্যালয় খনৰ পৰিচালনা সমিতিৰো কিছু দোষ- ক্ৰুটি থকাৰ কথা স্বীকাৰ কৰে ৷
আনহাতে আগন্তুক বিটিচি নিৰ্বাচনত বিজেপি আৰু বি পি এফৰ মাজৰ মিত্ৰতাক লৈও নিজৰ প্ৰতিক্ৰিয়া প্ৰকাশ কৰে সাংসদ বিশ্বজিৎ দৈমাৰীয়ে ৷ ৰাজনৈতিক ক্ষমতা শক্তিশালী কৰাৰ স্বাৰ্থত বিজেপিয়ে বিটিচি নিৰ্বাচনত অৱতীৰ্ণ হোৱাৰ কথা প্ৰকাশ কৰিছে যদিও নিৰ্বাচনৰ প্ৰাকক্ষণতহে দুই দলৰ মাজত স্থিৰ সিদ্ধান্ত গ্ৰহণ কৰিব পৰা যাব ৷ লগেত বিটিচিত বিজেপি শক্তিশালী হ'লে একো ক'ব লগা নাই বুলিও তাৎপৰ্যপূৰ্ণ মন্তব্য কৰে সাংসদগৰাকীয়ে ৷
ইয়াৰোপৰি পশ্চিমবংগ চৰকাৰে লোৱা ধপাত জাতীয় সামগ্ৰী নিষিদ্ধকৰণৰ সিদ্ধান্তৰ উদ্ধৃতি দি সাংসদ গৰাকীয়ে কয় যে, চৰকাৰে কেৱল আইন প্ৰণয়ন কৰি থাকিলেই সমস্যাৰ সমাধান নহয়, এই ক্ষেত্ৰত জনসাধাৰণৰ মাজতো সচেতনতা গঢ়ি উঠিলেহে কাৰ্যত আইনে সফল ৰূপ পাব ৷
