বৰমা,9 অক্টোবৰ: পৰ্যটকৰ সুবিধাৰ্থে শুকুৰবাৰৰ পৰা মানাহ ৰাষ্ট্ৰীয় উদ্যানত পুনৰ মুকলি হ’ল জীপ ছাফাৰী । কৰ’ণা মহামাৰীৰ বাবে বিগত 7 মাহে ৰাষ্ট্ৰীয় উদ্যানখনত বন্ধ আছিল জীপ ছাফাৰী ব্যৱস্থা ৷
ৰাষ্ট্ৰীয় উদ্যান কৰ্তৃপক্ষ আৰু মানাহ জীপ ছাফাৰী এছ’ছিয়েশ্যনৰ উদ্যোগত ৰঙা ফিটা কাটি এই অনুষ্ঠানৰ মুকলি কৰে মানাহ ৰাষ্ট্ৰীয় উদ্যানৰ ক্ষেত্ৰীয় ব্যঘ্ৰ প্ৰকল্প সঞ্চালক অমল কুমাৰ শৰ্মাই । ইয়াৰ লগতে জীপ ছাফাৰী এছ’ছিয়েশ্যনৰ বাবে নতুনকৈ ল’গ’ আৰু নম্বৰ পঞ্জীয়ণকৰণৰ ব্যৱস্থাও মুকলি কৰা হৈছে ৷
আনহাতে অনুষ্ঠানত উপস্থিত থাকি মানাহ জীপ ছাফাৰী এছ’ছিয়েশ্যনৰ সভাপতি আৰু সম্পাদক ক্ৰমে সঞ্জিৎ দাস আৰু অবিনাশ বড়োৱে 2 অক্টোবৰত উদ্যানখন পুনৰ মুকলি কৰাৰ পাচত জীপ ছাফাৰী কাৰ্যসূচী মুকলি কৰাতো সম্ভৱ হোৱাত তেওঁলোক যথেষ্ট পৰিমাণে উৎসাহিত হোৱা বুলি প্ৰকাশ কৰে । কৰ’ণা মহামাৰীৰ বাবে উদ্যানখনলৈ বিদেশী পৰ্যটকৰ আগমণ কমকৈ হ’লেও স্থানীয় পৰ্যটকৰ কিছু আগমণ ঘটিব বুলি দুয়োগৰাকীয়ে আশা প্ৰকাশ কৰে । লক ডাউনৰ ফলত সম্পূৰ্ণৰূপে বন্ধ হৈ থকাৰ পাচত চৰকাৰে লোৱা এই কাৰ্য ব্যৱস্থাই উদ্যানখনৰ পৰ্যটন উদ্যোগটোৰ ক্ষতি নিৰাময়ত বহু পৰিমাণে সহায় কৰিব বুলি তেওঁলোকে আশা প্ৰকাশ কৰে ।
চৰকাৰে একোখন জীপত 3 গৰাকীকৈ পৰ্যটকৰ ভ্ৰমণৰ অনুমোদন দিছিল যদিও বৰ্তমান 4 গৰাকীকৈ পৰ্যটকক অনুমতি দিয়াৰ বাবে এছ’ছিয়েশ্যনৰ সভাপতি আৰু সম্পাদকে যথেষ্ট সুখ লাভ কৰিছে । উদ্যান ভ্ৰমণৰ সময়ত সম্পূৰ্ণৰূপে ক’ভিড প্ৰট’কল মানি চলিব বুলিও তেওঁলোকে জানিবলৈ দিয়ে ।
সম্প্ৰতি,এছ’ছিয়েশ্যনৰ সৈতে মুঠ 98 খন জীপ আছে ৷ এই অনুষ্ঠানত উপস্থিত থাকে সঞ্চালক অমল শৰ্মাৰ উপৰিও উদ্যানখনৰ সহকাৰী সঞ্চালক ৰঘুনাথ বড়ো,বাঁহবাৰী বন কাৰ্যালয়ৰ বন বিষয়া বাবুল ব্ৰহ্ম আৰু কাৰ্যালয়টোৰ নবনিযুক্ত বন বিষয়া অভিনৱ বৰুৱা ৷
লগতে পঢ়ক: ৰঙিয়াত প্ৰশাসনৰ উদ্যোগত মাস্ক বিতৰণ আৰু সজাগতাৰ বিশেষ পদক্ষেপ
