বাক্সা, 11 অক্টোবৰ : বাক্সা জিলাৰ ডুমুণী চাহ বাগিচাৰ পৰা বিগত সময়ছোৱাত অব্যাহত আছে নাৰী সৰবৰাহৰ ঘটনা ৷ দৰিদ্ৰতাৰ সুযোগ লৈ নাৰী সৰবৰাহী চক্ৰটোৱে বহিৰাজ্যলৈ চালান দি আহিছে বহু মহিলা-যুৱতীক ৷ এই ব্যৱসায়ত জড়িত আছে একাংশ দালাল চক্ৰ ৷
ডুমুণী চাহ বাগিচাৰ 1 নম্বৰ লাইনত বাস কৰা ধনোৱা মুণ্ডা নামৰ ব্যক্তিজনৰ একমাত্ৰ কন্যাক বিগত পোন্ধৰ বছৰ পূৰ্বে কাম কৰিবৰ বাবে দিল্লীলৈ লৈ গৈছিল ৷ কিন্তু তেতিয়াৰে পৰা পৰিয়ালৰ সৈতে কোনো যোগাযোগ নাই ধনোৱা মুণ্ডাৰ কন্যাৰ ৷ মুণ্ডাৰ লগতে অন্য বহু পৰিয়ালৰ কন্যাক এনেদৰে নানান প্ৰলোভন দি লৈ যায় আৰু নাৰী ব্যৱসায়ীত জড়িত কৰে বিভিন্ন চক্ৰই ৷ ইয়াৰে বহুকেইগৰাকী যুৱতী উভতি আহিছে যদিও আন বহুকেইগৰাকী বৰ্তমানেও উভতি আহিবলৈ সক্ষম হোৱা নাই ৷
এই সম্পৰ্কে বাক্সা জিলা আদিবাসী ছাত্ৰ সন্থাৰ সম্পাদক আলবিনাছ তীগ্গাই কয় যে, শিক্ষাৰ অভাৱ আৰু দৰিদ্ৰতাৰ সুযোগ গ্ৰহণ কৰি বিভিন্ন প্ৰলোভনেৰে একাংশ দালালে দৈনিক আদিবাসী জনগোষ্ঠীটোৰ যুৱতী-মহিলাসকলক বহিৰাজ্যলৈ লৈ যায় । ইতিমধ্যে এই সন্দৰ্ভত আছাই আৰক্ষী প্ৰশাসনক অৱগত কৰিছে যদিও কোনো সুফল লাভ কৰিবলৈ সক্ষম হোৱা নাই ।
