বাক্সা, ২০ আগষ্টঃ ভুল চিকিৎসাৰ বলি হৈ বাক্সাৰ সূৱণখাটাত ৰাজু বসুমতাৰী নামৰ লোকজনে মৃত্যুক সাৱটি লোৱাৰ গুৰুতৰ অভিযোগ উত্থাপন কৰিছে পৰিয়ালবৰ্গই৷ জানিব পৰামতে 6 আগষ্টত বাক্সা জিলাৰ সুৱণখাটাৰ দক্ষিণকুছিৰ ৰাজু বসুমতাৰী নামৰ লোকজনৰ কাঁহ আৰু জ্বৰ হোৱাৰ বাবে তামুলপুৰত থকা ডা: নবীন চন্দ্ৰ ৰাভা মেম'ৰিয়েল ক্লিনিকত চিকিৎসা কৰিছিল৷ক্লিনিক খনৰ চিকিৎসক ডাঃ কংকন ৰাভাই চাই কৰি ৰাজু বসুমতাৰী নামৰ লোকজন যক্ষ্মা ৰোগত আক্ৰান্ত হোৱা বুলি কেইটামান পৰীক্ষা কৰিবলৈ নিৰ্দেশ দি দুবিধমান ঔষধ প্ৰদান কৰি ঘৰলৈ পঠিয়াই দিয়ে৷ ৰাজু বসুমতাৰীয়েও চিকিৎসকৰ পৰামৰ্শমতে ঔষধ সেৱন কৰাৰ পিচতে অচেতন হৈ পৰে৷ পৰিয়ালৰ লোকে লগে লগে চিকিৎসক কংকন ৰাভাৰ লগত যোগাযোগ কৰাত চিকিৎসকজনে নিজৰ ভুল স্বীকাৰ কৰি উন্নত চিকিৎসাৰ বাবে আন ঠাইলৈ নিয়াৰ বাবে পৰামৰ্শ দিয়েই দায়িত্ব সামৰে৷
ইফালে পৰিয়ালৰ লোকসকলে ততাতৈয়াকৈ প্ৰথমে মুছলপুৰ আৰু পিচত গুৱাহাটী চিকিৎসা মহাবিদ্যালয়লৈ নিয়ে যদিও অৱস্থাৰ কোনো পৰিৱৰ্তন নহ'ল ৰাজু বসুমতাৰীৰ৷ পিচত উপায়ন্তৰ হৈ লোকজনৰ পৰিয়ালে চিকিৎসক কংকন ৰাভাৰ বিৰুদ্ধে তামুলপুৰ আৰক্ষী থানাত ১৪ আগষ্টত এখন এজাহাৰ দাখিল কৰ৷ পৰিয়ালৰ অভিযোগ ভুল চিকিৎসাৰ বলি হৈছে ৰাজু বসুমতাৰী ৷ কোনো ধৰণৰ পৰীক্ষা নিৰীক্ষা নকৰি সন্দেহত যক্ষ্মাৰ ঔষধ দিয়া বাবেই ৰাজুৱে মৃত্যুক আঁকোৱালি ললে৷ আনহাতে সোমবাৰে ৰাজু বসুমতাৰীয়ে অকাল মৃত্যুক সাৱটি লোৱাত দক্ষিণকুছিৰ ঘৰত দণ্ডাধীশসহ আৰক্ষী উপস্থিত হৈ মৃতদেহটো মৰণোত্তৰ পৰীক্ষাৰ বাবে মুছলপুৰলৈ প্ৰেৰণ কৰে ৷
