বাক্সা, 7 আগষ্ট : অৱশেষত উদ্ধাৰ হৈছে বাক্সাৰ দ্বাৰকুছিত বন্ধুৰ সৈতে গা ধুই থকা অৱস্থাত বৰলীয়া নৈত উটি যোৱা যুৱকৰ মৃতদেহ । বৃহস্পতিবাৰে গা ধুই থকা অৱস্থাত বৰলীয়া নৈৰ পানীয়ে উটুৱাই নিছিল ৬ জনকৈ যুৱকক । যাৰ পাছত ৰাইজে ৪ জন যুৱকক জীৱিত অৱস্থাত উদ্ধাৰ কৰিবলৈ সক্ষম হৈছিল যদিও দুজন যুৱকৰ কোনো সন্ধান উলিয়াব পৰা নাছিল । পৰৱৰ্তী সময়ত ঘটনাস্থলীত এছ ডি আৰ এফ বাহিনীয়ে চাৰি ঘন্টা ধৰি নদীত অভিযান চলায়ো কোনো সন্ধান উলিয়াব নোৱাৰিলে যুৱক দুজনৰ ।
কিন্তু ৰাইজে নিশাৰ ভাগত মদন নন্দী (২৩) নামৰ এজনৰ মৃতদেহ নদীৰ পৰা উদ্ধাৰ কৰিবলৈ সক্ষম হয়। মদনৰ মৃতদেহ উদ্ধাৰৰ পিছতে এক শোকাকুল পৰিৱেশে বিৰাজ কৰে সমগ্ৰ অঞ্চলটোত ।
আনহাতে বৰ্তমানেও কোনো সন্ধান নাই চুমন নন্দী (১৭) নামৰ যুৱকজনৰ । ৰাইজে নদীত বৰ্তমানেও যুৱকজনৰ সন্ধান উলিওৱাৰ বাবে চেষ্টা অব্যাহত ৰাখিছে বুলি জানিব পৰা গৈছে ।
লগতে পঢ়ক : ডিমা হাছাওত ক'ভিড-19ত আক্ৰান্তৰ সংখ্যা 202 লৈ বৃদ্ধি
