বৰমা,21 নৱেম্বৰঃ এজন বিশেষ ব্যক্তি ৷ এটা জনগোষ্ঠীৰ অধিকাৰৰ দাবীত তেওঁৰ নেতৃত্বত চলিছিল বহু সংগ্ৰাম ৷ ব্যক্তিজনৰ কথাই জনগোষ্ঠীটোৰ বাবে আছিল শিলৰ ৰেখা ৷ নেতৃত্ব দিছিল এটা ছাত্ৰ সংগঠনক ৷ কিছুদিন আগলৈ সংগঠনৰ সদস্যসকলৰ বাবে আছিল তেখেতে আঁতধৰোটা ৷ কিন্তু নেতৃত্ব ত্যাগৰ পিছতে ছাত্ৰ সংগঠনটোৰ বাবে তেওঁ হৈ পৰিল চকুৰ কূটা দাঁতৰ শাল ৷ নিজে গঠন কৰা ছাত্ৰ সংগঠনৰ সদস্যৰ প্ৰতিবাদৰো সন্মুখীনো হ’ল তেওঁ ৷ এই নেতাজনেই হৈছে সদৌ অসম গোৰ্খা ছাত্ৰ সন্থাৰ প্ৰাক্তন সভাপতি প্ৰেম তামাং ৷
উল্লেখ্য যে, কিছুদিন পূৰ্বে গোৰ্খা ছাত্ৰ সন্থাৰ সভাপতি পদ ত্যাগ কৰি প্ৰেম তামাঙে যোগদান কৰিছিল বিজেপিত ৷ পৰৱৰ্তী সময়ত ৰাজ্য চৰকাৰে গঠন কৰা গোৰ্খা উন্নয়ন পৰিষদৰ অধ্যক্ষৰ পদত অধিষ্ঠিত হয় তামাং ৷ কিন্তু গোৰ্খা ছাত্ৰ সন্থাই বিচৰা নাছিল গোৰ্খা উন্নয়ন পৰিষদ ৷ ছাত্ৰ সংগঠনটোৱে জনগোষ্ঠীটোৰ সৰ্বাংগীন উন্নয়নৰ বাবে দাবী কৰিছিল গোৰ্খা স্বায়ত্ব শাসিত পৰিষদ ৷ শুকুৰবাৰে ২৩নং দিহিৰা সমষ্টিত গোৰ্খা প্ৰাৰ্থিৰ হৈ নিৰ্বাচনী প্ৰচাৰ চলাবলৈ যোৱা সময়তেই তেখেতক ক’লা পতাকা দেখুৱায় গোৰ্খা ছাত্ৰ সন্থাৰ সদস্যসকলে ৷ তামাঙৰ বাহন আগচি ধৰি মুৰ্দাবাদ ধ্বনি দিয়ে সংগঠনটোৰ সদস্যসকলে ৷
লগতে পঢ়ক-ডিজিটেল প্ৰক্ৰিয়াৰে অনুষ্ঠিত হ'ব কংগ্ৰেছ অধ্যক্ষৰ নিৰ্বাচন
