বৰমা, ১২ জানুৱাৰী: "মদাহী ভাষা বহুলকৈ প্ৰচলন কৰক ৷ জনগোষ্ঠীয় ভাষা ব্যৱহাৰৰ ক্ষেত্ৰত জেনেৰেচন গেপ নকৰিব ৷" দেওবাৰে বৰমা ছোৱালী হাইস্কুলৰ পেক্ষাগৃহত সদৌ অসম মদাহী জনজাতি ছাত্ৰ সন্থাৰ ৩৪ তম প্ৰতিষ্ঠা দিৱসত উপস্থিত থাকি এই মন্তব্য কৰে বিটিচি প্ৰধান হাগ্ৰামা মহিলাৰীয়ে ৷ জনগোষ্ঠীসমূহে উন্নয়ন পৰিষদৰ জড়িয়তে চৰকাৰৰ পৰা সুবিধাসমুহ ল'বলৈ আহ্বান জনায় মহিলাৰীয়ে ৷ বিজয় মদাহীৰ সভাপতিত্বত অনুষ্ঠিত হোৱা মুকলি সভাত সদৌ অসম মদাহী সন্মীলনীৰ প্ৰাক্তন সভাপতি প্ৰেমানন্দ মদাহীয়ে জনগোষ্ঠীৰটোৰ ঐতিহ্য সন্দৰ্ভত বক্তব্য আগবঢ়ায় ৷ বিটিএডিত থকা জনজাতি সুৰক্ষ মঞ্চক সমালোচনা কৰে প্ৰেমানন্দ মদাহীয়ে ৷ জনজাতি সকলৰ অস্তিত্ব ৰক্ষাৰ কাৰণে আমি সংগ্ৰাম কৰিব লাগিব বুলি বক্তব্য আগঢ়ায় সদৌ অসম ট্ৰাইবেল সংঘৰ প্ৰাক্তন সম্পাদক থানেশ্বৰ বড়োৱে ৷
ইয়াৰ পিছতেই স্মৃতিগ্ৰন্থ " আলোন" উন্মোচন কৰা হয় ৷
ইয়াৰ পূৰ্বে পুৱা মুখ্য দ্বাৰ মুকলি কৰে সদৌ অসম মদাহী সন্মিলনীৰ প্ৰাক্তন সম্পাদক অতুল মদাহীয়ে ৷ ইয়াৰ পাছতেই মদাহী জনগোষ্ঠী ছাত্ৰসন্থাৰ পতাকা উত্তোলন কৰে সদৌ অসম মদাহী ছাত্ৰ সন্থাৰ সভাপতি বিজয় মদাহীয়ে ৷ ১০ বজাত বৃক্ষ ৰোপন কৰে থানেশ্বৰ বড়ো (সদৌ অসম ট্ৰাইবেল সংঘৰ প্ৰাক্তন সম্পাদক) নিৰঞ্জন মদাহী, সাংবাদিক দিলীপ বড়ো, সদৌ অসম মদাহী জনজাতি ছাত্ৰ সন্থাৰ উপদেষ্টা দিলিপ মদাহীয়ে ৷ ১০.৩০ বজাত বাৰেবৰণীয়া সাংস্কৃতিক শোভাযাত্ৰা উন্মোচন কৰে বাক্সা জিলাৰ উপ আৰক্ষী অধীক্ষক প্ৰনৱ জ্যোতি কলিতাই ৷ দিনৰ ১২ বজাত "মদাহী জনগোষ্ঠীৰ আৰ্থ সামাজিক সমস্যা আৰু ইয়াৰ সমাধান ৷" আলোচনা চক্ৰ সঞ্চালনা কৰে সদৌ অসম মদাহী জনজাতি ছাত্ৰ সন্থাৰ সভাপতি বিজয় মদাহীয়ে ৷
