স্পৰ্টছ ডেস্ক, ২ এপ্ৰিলঃ ক্ৰীড়া প্ৰেমীলৈ আহিল আন এটা দুখবৰ । টকিঅ' অলিম্পিকৰ পাচত এইবাৰ বাতিল কৰা হ'ল ঐতিহ্য়পূৰ্ণ প্ৰতিযোগিতা উইম্বলডন । যোৱা ৭৫ টা বছৰে যি হোৱা নাছিল কৰ'ণা ভাইৰাছৰ ফলত সেয়াই সংঘটিত হ'ল এইবাৰ । দ্বিতীয় বিশ্বযুদ্ধৰ পাচত প্ৰথমবাৰৰ বাবে বাতিল কৰা হ'ল উইম্বলডন । আগন্তুক ২৯ জুনৰ পৰা আৰম্ভ হ'বলগীয়া আছিল এই প্ৰতিযোগিতাখন । কিন্তু কোভিড-১৯ মহামাৰীৰ ভয়াৱহ প্ৰকোপৰ প্ৰতি লক্ষ্য ৰাখিয়ে শেহতীয়াকৈ এই প্ৰতিযোগিতা বাতিলৰ সিদ্ধান্ত গ্ৰহণ কৰা হয় ।
এই সন্দৰ্ভত ইংলেণ্ড লন টেনিছ ক্লাৱৰ চেয়াৰমেন ইয়ান হিউইটে কয় যে, এইয়া সিদ্ধান্তটো লোৱাটো আমাৰ বাবে যথেষ্ট কঠিন আছিল । বিশ্বযুদ্ধৰ বাদে কেতিয়াও এই প্ৰতিযোগিতা আয়োজনত ব্যাঘাত জন্মা নাছিল । কিন্তু বিশ্ব সংকটৰ সময়ত সকলো দিশ চালি-জাৰি চাই প্ৰতিযোগিতা বাতিল কৰাটোৱে সঠিক সিদ্ধান্ত হ'ব ।
