আমগুৰি, 9 জুলাই : চমুৱাৰ আগিয়াত অনুষ্ঠিত হোৱা কমনৱেলথ ভাৰোত্তোলন চেম্পিয়নশ্বিপৰ জুনিয়ৰ 45 কেজি শাখাত স্বৰ্ণ পদক দখল কৰিছে বৰ্ণালী বড়াই ৷ শিৱসাগৰ জিলাৰ ভাৰোত্তোলন সন্থাৰ খেলুৱৈ তথা দিখৌমুখ ৰঘুবাৰী গাঁৱৰ ৰিতুমণি বড়া আৰু দিব্যলতা বড়াৰ কন্যা বৰ্ণালীয়ে এই জয়েৰে অসমলৈ গৌৰৱ কঢ়িয়াবলৈ সক্ষম হৈছে ৷ জুলাইৰ 9 তাৰিখৰ পৰা 14 লৈ অনুষ্ঠিত হোৱা চেম্পিয়নশ্বিপত 45 কেজি শাখাত বৰ্ণালীয়ে মুঠ 132 কেজি উত্তোলন কৰে ।
![ETV BHARAT ASSAM](https://etvbharatimages.akamaized.net/etvbharat/prod-images/3790322_1.jpg)
দিখৌমুখ উচ্চতৰ মাধ্যমিক বিদ্যালয়ৰ দ্বাদশ শ্ৰেণীৰ ছাত্ৰী বৰ্ণালীয়ে সীমিত সা - সুবিধাৰে ক্ৰীড়া নিৰ্দেশক শৰৎ মোহন নেওগ আৰু গৌৰাংগ বড়াৰ তত্ত্বাৱধানত ভাৰোত্তোলনৰ আদিপাঠ গ্ৰহণ কৰিছিল । কৃষক পৰিয়ালৰ খেলুৱৈ গৰাকীয়ে ইতিপূৰ্বে ৰাষ্ট্ৰীয় চেম্পিয়ন হোৱাৰ লগতে খেল' ইণ্ডিয়াত নতুন ৰাষ্ট্ৰীয় অভিলেখ গঢ়িবলৈ সক্ষম হৈছিল । বৰ্তমান পাটিয়ালাৰ ভাৰতীয় দলৰ প্ৰশিক্ষণ শিবিৰত প্ৰশিক্ষণ গ্ৰহণ কৰি থকা বৰ্ণালীয়ে আগন্তুক ২০২০ চনৰ ভাৰতীয় অলিম্পিক প্ৰস্তুতি শিবিৰলৈও নিৰ্বাচিত হৈ অন্য এক গৌৰৱৰ অধিকাৰী হৈছে ।