গুৱাহাটী,18 জানুৱাৰীঃ তৃতীয় খেল' ইণ্ডিয়া য়ুথ গেমছত দেওবাৰে ছেমি ফাইনেলৰ বাবে বক্সিঙ ৰিঙত নামিব অসমৰ প্ৰতিভাবান মহিলা বক্সিঙ খেলুৱৈ অংকুশিতা বড়ো । অংকুশিতাই স্বৰ্ণ পদক লাভ কৰিব বুলি দৃঢ় বিশ্বাসী অসমৰ মুখ্য বক্সিঙ প্ৰশিক্ষক অমৰ ডেকা ।
দেওবাৰৰ পৰা তৃতীয় খেল' ইণ্ডিয়া য়ুথ গেমছত স্বৰ্ণ আৰু ৰূপৰ পদকৰ বাবে বক্সিঙ ৰিঙত নামিব বক্সাৰ সকল । দেশৰ অন্যান্য ৰাজ্য সমূহৰ লগতে অসমৰ বক্সাৰ সকলেও নামিব ৰিঙত । ইতিমধ্যে শুকুৰবাৰ পৰ্যন্ত অসমৰ ৩৪ গৰাকী পুৰুষ-মহিলা বক্সাৰৰ ভিতৰত ১৫ গৰাকী বক্সাৰে ছেমি ফাইনেলৰ বাবে যোগ্যতা অর্জন কৰিছে । শনিবাৰেও কেইবাগৰাকী বক্সাৰে ছেমি ফাইনেলৰ বাবে ৰিঙত নামে । ছেমি ফাইনেলত অসমৰ বক্সাৰ সকলৰ ভিতৰত অংকুশিতা বড়োৰ ওপৰত দৃষ্টি থাকিব ক্ৰীড়াপ্ৰেমী অসমবাসী ৰাইজৰ । অসম বক্সিঙৰ মুখ্য প্ৰশিক্ষক অমৰ ডেকাৰ দৃঢ় বিশ্বাস অংকুশিতাই নিৰাশ নকৰে অসমবাসী ৰাইজক ।
উল্লেখ্য যে, ভাৰতীয় বক্সিঙ জগতত ইতিমধ্যে শিৱ থাপা আৰু লাভলীনা বুঢ়াগোহাঁইৰ নিচিনা বক্সাৰে অসমৰ পৰা প্ৰতিনিধিত্ব কৰি অসমৰ বক্সিঙ জগতক দেশবাসীৰ আগত প্ৰমাণিত কৰিবলৈ সক্ষম হৈছে ।
লগতে পঢ়ক-অৰুণাচল প্ৰদেশৰ ছিজুচাত ‘পাকে পাগা’ উৎসৱ
