ফিফাৰ কাৰ্যবাহী পৰিষদলৈ নিৰ্বাচিত প্ৰথমগৰাকী ভাৰতীয়

সৰ্বভাৰতীয় ফুটবল ফেডাৰেশ্বনৰ সভাপতি তথা এছিয়ান ফুটবল কনফেডাৰেশ্বনৰ জ্যেষ্ঠ উপ-সভাপতিৰ দায়িত্ব পালন কৰি থকাৰ সময়তে ফিফালৈ নিৰ্বাচিত হৈছে প্ৰফুল পেটেল

স্পৰ্টছ ডেস্ক, 6 এপ্ৰিলঃ ভাৰতীয় ফুটবলপ্ৰেমীলৈ সুখবৰ কঢ়িয়াই আনিছে সৰ্বভাৰতীয় ফুটবল ফেডাৰেশ্যনৰ সভাপতি প্ৰফুল পেটেলে ৷ শনিবাৰে কুৱালালামপুৰত অনুষ্ঠিত হোৱা 29 সংখ্যক এছিয়ান ফুটবল কনফেডাৰেশ্যন কংগ্ৰেছত সৰ্বমুঠ 38টা ভোটেৰে ফিফালৈ নিৰ্বাচিত হয় পেটেল ৷

এছিয়ান ফুটবল কনফেডাৰেশ্যনৰ জ্যেষ্ঠ উপ-সভাপতিৰ দায়িত্বত থকা ভাৰতীয় ফুটবল ফেডাৰেশ্বনৰ সভাপতিগৰাকীয়ে 46টা ভোটৰ ভিতৰত 38টা ভোট লাভ কৰি সাতগৰাকী প্ৰতিদ্বন্দীৰ মাজৰ পৰা ফিফালৈ নিৰ্বাচিত হৈছে ৷ ফিফাৰ কাৰ্যবাহী পৰিষদৰ সদস্য হিচাপে নিৰ্বাচিত হ'বলৈ সক্ষম হোৱা প্ৰফুল পেটেল হৈছে প্ৰথমগৰাকী ভাৰতীয় ৷

প্ৰফুল পেটেলৰ বিপক্ষে প্ৰতিদ্বন্দিতা আগবঢ়াইছিল আই মহান্নাদী (কাটাৰ), খালিদ আৱাদ এ এলথেবিটি ( ছৌদি আৰব), মাৰিয়ানো ভি আৰানেতা জুনিয়ৰ (ফিলিপাইনছ), চুং মুং গ্যু (কোৰিয়া ৰিপাব্লিক), ডু হোকাই (চীন), মেহদি তাজ (ইৰাণ) আৰু কজো টাছিমাই (জাপান) ৷

ফিফাৰ কাৰ্যবাহী পৰিষদত পেটেলৰ উপস্থিতিয়ে ভাৰতীয় ফুটবলক নতুন গতি প্ৰদান কৰিবলৈ সক্ষম হ'ব বুলি বহুসংখ্যকে প্ৰকাশ কৰিছে ৷ পেটেলৰ জয়লাভক শুভকামনা প্ৰদান কৰি ভৱিষ্যতে ভাৰতীয় ফুটবলে বহুদুৰ আগবাঢ়ি যাবলৈ সক্ষম হ'ব বুলি প্ৰকাশ কৰিছে ভাৰতীয় ফুটবল ফেডাৰেশ্যনৰ উপ-সভাপতি সুব্ৰত দত্তই ৷