গুৱাহাটী, 26 নৱেম্বৰ: গুৱাহাটীৰ ইন্দিৰা গান্ধী এথলেটিকছ ষ্টেডিয়ামত বুধবাৰে সন্ধিয়া 7.30 বজাত অনুষ্ঠিত হ'ব আই এছ এলৰ এখন গুৰুত্বপূৰ্ণ মেচ । ঘৰুৱা দল নৰ্থ ইষ্ট ইউনাইটেড এফ চিৰ মুখামুখি হ'ব মুম্বাই চিটি এফ চি । ইতিমধ্যেই গুৱাহাটীত আহি উপস্থিত হৈছে দুয়োটা দল । মঙলবাৰে সৰুসজাইৰ সভাগৃহত দুয়োটা দলে পৃথকে পৃথকে সংবাদমেল সম্বোধন কৰে ।
প্ৰথমে মুম্বাই চিটি এফ চিৰ মুখ্য প্ৰশিক্ষক জৰ্গ ক'ষ্টা আৰু খেলুৱৈ আম্ৰিন্দাৰ সিঙে দলটোৰ প্ৰস্তুতিৰ কথা সংবাদ মাধ্যমৰ আগত প্ৰকাশ কৰে । ঘৰুৱা দলটোক হৰুৱাৰ বাবে প্ৰস্তুতি সম্পূৰ্ণ কৰিছে বুলি উল্লেখ কৰে ৷ শক্তিশালী নৰ্থ ইষ্ট ইউনাইটেডক পৰাজিত কৰি পইন্ট তালিকাত অগ্ৰগতি লাভৰ লক্ষ্যৰে অৱতীৰ্ণ হ’ব মুম্বাই এফ চি দলটো ৷ এই কথা ব্যক্ত কৰে মুখ্য প্ৰশিক্ষক জৰ্গ ক'ষ্টাই । অৱশ্যে বহুকেইগৰাকী খেলুৱৈ অসুস্থতাৰ বাবে কিছু সমস্যাৰ সন্মুখীন হোৱাৰ কথাও উল্লেখ কৰে মুখ্য প্ৰশিক্ষকগৰাকীয়ে ।
ইফালে দুখনকৈ খেলত জয়ী আৰু দুখন খেলত ড্ৰ'ৰেৰে অধিক আত্মবিশ্বাসী হৈ আছে নৰ্থ ইষ্ট ইউনাইটেড এফ চি দলটো । পৰৱৰ্তী খেলৰ বাবে দলটো সম্পূৰ্ণ প্ৰস্তুত বুলি উল্লেখ কৰে সহকাৰী প্ৰশিক্ষক খালিদ জামিলে । বিৰোধী দলক সদায়ে শক্তিশালী বুলি গণ্য কৰি খেলত অৱতীৰ্ণ হ'ব লাগে বুলি মন্তব্য কৰে সহকাৰী প্ৰশিক্ষকগৰাকীয়ে ।
উল্লেখযোগ্য যে আই এছ এলৰ পইণ্টছ তালিকাত 8 পইন্টৰে চতুৰ্থ স্থানত নৰ্থ ইষ্ট ইউনাইটেড এফ চি থকাৰ বিপৰীতে 4 পইন্টৰে অষ্টম স্থানত আছে মুম্বাই চিটি এফ চি দলটো । মুঠতে বুধবাৰৰ খেলখন তীব্ৰ প্ৰতিদ্বন্দিতামূলক হ'ব বুলি ধাৰণা কৰিব পাৰি ।
লগতে চাওক- ইংলেণ্ডৰ খেলুৱৈক ক্ষমা প্ৰাৰ্থনা নিউজিলেণ্ডৰ অধিনায়কৰ ! কিন্তু কিয় ?
