স্পৰ্টছ ডেস্ক, 11 নৱেম্বৰ : শনিবাৰে কলকাতাৰ আইকনিক ইডেন গাৰ্ডেনত অনুষ্ঠিত চলিত এদিনীয়া বিশ্বকাপৰ নিজৰ অন্তিমখন লীগ মেচত ইংলেণ্ডে পাকিস্তানক 93 ৰাণত পৰাস্ত কৰে ৷ এই মেচত পাকিস্তানৰ বেগী বলাৰ হেৰিছ ৰৌফে এনে এক অভিলেখ সৃষ্টি কৰিলে যিটো তেওঁ একেবাৰেই বিছৰা নাছিল ৷ এদিনীয়া বিশ্বকাপৰ একক সংস্কৰণত সৰ্বাধিক ৰাণ দিয়া বলাৰ হিচাপে পৰিগণিত হৈছে ৰৌফ ৷ 3/64 ৰে সৰ্বাধিক ৰাণ দিয়া বলাৰ হৈ পৰিল ৰৌফ ৷
এই বিশ্বকাপত হেৰিছ ৰৌফে 9 খন মেচ খেলিছিল আৰু এই সময়ছোৱাত তেওঁ 533 ৰাণ দিয়ে ৷ ইয়াৰ লগে লগে তেওঁ এদিনীয়া বিশ্বকাপৰ ইতিহাসত সৰ্বাধিক ৰাণ দিয়া বলাৰ হিচাপে পৰিগণিত হয় ৷ তেওঁৰ পূৰ্বে এই অভিলেখ আছিল ইংলেণ্ডৰ স্পীন বলাৰ আদিল ৰছিদৰ নামত ৷ 2019 চনৰ বিশ্বকাপত ৰছিদে 526 ৰাণ দিছিল ৷ একে সময়তে এই বিশ্বকাপত 525 ৰাণ খৰছ কৰি এই তালিকাৰ তৃতীয় স্থানত আছে শ্ৰীলংকাৰ দিলছান মধুশংকা ৷
তদুপৰি এদিনীয়া বিশ্বকাপৰ ইতিহাসত একক সংস্কৰণত সৰ্বাধিক ছয় সংগ্ৰহ কৰা প্ৰথমজন বলাৰ হিচাপে পৰিগণিত হৈছে হেৰিছ ৰৌফ ৷ 9 খন মেচত 16 টা ছয় কোবায় ৷ পাকিস্তানৰ অন্যতম আগশাৰীৰ বেগী বলাৰ হেৰিছ ৰৌফ ৷ ক্ৰিকেট বিশেষজ্ঞ আৰু পাকিস্তানৰ অনুৰাগীসকলে ভাৰতীয় খেলপথাৰত তেওঁ বিধ্বংসী ৰূপ ধাৰণ কৰিব বুলি কৈ আছিল যদিও এই প্ৰতিযোগিতাত ৰৌফ সম্পূৰ্ণৰূপে ব্যৰ্থ হয় ৷
ইফালে শনিবাৰে ইংলেণ্ডৰ বিৰুদ্ধে অনুষ্ঠিত হোৱা খেলখনত ইংলেণ্ডৰ হাতত 93 ৰাণত পৰাস্ত হৈছে পাকিস্তান ৷ এই মেচখনত হেৰিছ ৰৌফে 10 অভাৰত 64 ৰাণ খৰছ কৰি 11টা ৱাইডসহ দখল কৰে 3 টা উইকেট ৷
লগতে পঢ়ক : ICC World Cup 2023 : পাকিস্তানৰ বিৰুদ্ধে 93 ৰাণত জয়লাভ ইংলেণ্ডৰ
