স্পৰ্টছ ডেস্ক,৩১ ডিচেম্বৰ : শেহতীয়াকৈ দক্ষিণ আফ্ৰিকাৰ বিৰুদ্ধে টেষ্ট মেচত শোচনীয় পৰাজয়ৰ সন্মুখীন হৈছে ভাৰতীয় পুৰুষ দল । শৃংখলাৰ প্ৰথমখন টেষ্টতে ভাৰতৰ পৰাজয়ৰ পাছত বিভিন্ন মহলত প্ৰতিক্ৰিয়াৰো সৃষ্টি হৈছে । ভাৰতৰ বেটছমেনসকলৰ ফৰ্মক লৈও বিভিন্ন তাৰকা ক্ৰিকেটাৰে মন্তব্য কৰিছে । ইয়াৰ মাজতে শুভমন গিলৰ প্ৰদৰ্শনক লৈ গুৰুত্বপূৰ্ণ মন্তব্য কৰে প্ৰাক্তন ক্ৰিকেটাৰ সুনীল গাভাস্কাৰে । টেষ্টত বেটিং কৰাৰ সময়ত গিলৰ স্বভাৱসুলভ আক্ৰমণাত্মক অভিপ্ৰায় নিয়ন্ত্ৰণ কৰিবলৈ গাভাস্কাৰে পৰামৰ্শ দিয়ে ।
উল্লেখ্য যে চেঞ্চুৰিয়ানত অনুষ্ঠিত প্ৰথমখন টেষ্টত ভাৰতীয় অপেনাৰ শুভমন গিলে অতি কম ৰাণ কৰে । প্ৰথম ইনিংছত মাত্ৰ ২ ৰাণ আৰু দ্বিতীয় ইনিংছত ২৬ ৰাণ কৰে গিলে । পেচাৰ নান্দ্ৰে বাৰ্গাৰ আৰু মাৰ্কো জানচেনৰ হাতত গিলে নিজৰ উইকেট হেৰুৱায় । আনহাতে ভাৰতেও আৰম্ভণিৰ টেষ্টখনত এটা ইনিংছ আৰু ৩২ ৰাণত পৰাজিত হয় । ইফালে টেষ্টত গিলৰ প্ৰদৰ্শন সম্পৰ্কত গাভাস্কাৰে বগা বলৰ ফৰ্মেটৰ তুলনাত টেষ্ট ক্ৰিকেটৰ বিভিন্ন প্ৰয়োজনীয়তা গ্ৰহণ কৰিবলৈ পৰামৰ্শ দিয়ে ।
গাভাস্কাৰে কয় যে তেওঁৰ মতে গিলে টেষ্ট ক্ৰিকেটত অলপ বেছি আক্ৰমণাত্মকভাৱে খেলি আছে । টি-২০ আৰু এদিনীয়া ক্ৰিকেটৰ তুলনাত টেষ্ট ক্ৰিকেট খেলত সামান্য পাৰ্থক্য থাকে । এই পাৰ্থক্যটো বলত আছে । ৰঙা বলটো বতাহত বগা বলতকৈ অলপ বেছি গতি কৰে । পিটছত ই অলপ বেছি বাউন্স কৰে । গাভাস্কাৰৰ মতে গিলে এই কথাটো মনত ৰাখিব লাগে ।
গিলে সীমিত অভাৰৰ ফৰ্মেটত সুন্দৰ প্ৰদৰ্শন কৰিছে যদিও টেষ্টত ২০২৩ চনত ১০ টা ইনিংছত মাত্ৰ এবাৰ ৫০ ৰ অধিক ৰাণ কৰিবলৈ সক্ষম হৈছে । মাৰ্চত ঘৰুৱা খেলপথাৰত অষ্ট্ৰেলিয়াৰ বিৰুদ্ধে এটা শতক কৰিছে । তেওঁৰ আন ৯ টা ইনিংছৰ ৰাণ আছিল ক্ৰমে ২১, ৫, ১৩, ১৮, ৬, ১০, ২৯ (নট আউট), ২ আৰু ২৬ । অৱশ্যে গাভাস্কাৰে আশা কৰিছে যে গিলে তেওঁৰ পৰিসৰত শীঘ্ৰে উপনিত হ'ব ।
গাভাস্কাৰে লগতে কয় যে শুভমান গিলে তেওঁৰ কেৰিয়াৰ যিমান ভালদৰে আৰম্ভ কৰিছিল আৰু সকলোৱে তেওঁৰ শ্বটবোৰৰ প্ৰশংসা কৰিছিল । সেয়ে সকলোৱে আশা কৰিছে যে তেওঁ পুনৰ ফৰ্মলৈ ঘূৰি আহিব । গিলে যাতে অধিক কঠিন প্ৰশিক্ষণ লয় আৰু ভৱিষ্যতে ভাল প্ৰদৰ্শন কৰে তাৰো আশা কৰে প্ৰাক্তন ক্ৰিকেটাৰগৰাকীয়ে ।
ইফালে ভাৰতে অহা ৩ জানুৱাৰীৰ পৰা কেপ টাউনত দক্ষিণ আফ্ৰিকাৰ বিৰুদ্ধে দ্বিতীয় আৰু অন্তিমখন টেষ্ট খেলিব । সেই খন টেষ্টত ভাৰতে শৃংখলাটো ড্ৰ' কৰাৰ বাবে চেষ্টা কৰিব । আনহাতে গিলকে ধৰি ভাৰতীয় বেটছমেনসকলে পুনৰ উন্নত প্ৰদৰ্শন কৰিব বুলিও আশা কৰিছে ভাৰতীয় অনুৰাগীয়ে ।
লগতে পঢ়ক :2023 ত সৰ্বাধিক আন্তঃৰাষ্ট্ৰীয় শতক অৰ্জন কোহলী-গিলৰ
