নিউজ ডেস্ক,২৯ জুন: নতুন কমলা ৰঙৰ জাৰ্ছী পৰিধান কৰি ফ'টোৰ বাবে প'জ দিলে টীম ইণ্ডিয়াই। 'অ'ৰেঞ্জ ইজ দা নিউ ব্লু' প্ৰচাৰ অভিযানেৰে ইংলেণ্ডৰ বিৰুদ্ধে খেলপথাৰত নামিব কোহলী নেতৃত্বাধীন দলটো। বৰ্তমানলৈকৈ দুৰ্দান্ত প্ৰদৰ্শন আগবঢ়োৱা ভাৰতীয় দলে এই মেচত জয়ী হ'লেই ছেমি ফাইনেলত প্ৰৱেশ কৰিব।
বিচিচিআইয়ে নতুন জাৰ্ছী প্ৰকাশ কৰাৰ পাছতে দলৰ ক্ৰিকেটাৰ সকলে চ'ছিয়েল মিডিয়াৰ জৰিয়তে জাৰ্ছী পৰিধান কৰা ফ'টো শ্বেয়াৰ কৰে।
লেগ স্পীনাৰ য়ুজবেন্দ্ৰ ছাহালে টুইটাৰৰ জৰিয়তে নতুন জাৰ্ছী পৰিধান কৰি ইংলেণ্ডৰ বিৰুদ্ধে যুঁজিবলৈ সাজু বুলি মন্তব্য কৰে । মহম্মদ ছামীয়েও টুইটাৰৰ জৰিয়তে ফ'টো প্ৰকাশ কৰি আগন্তুক মেচৰ বাবে সাজু বুলি জনায়। ইয়াৰোপৰি,ভাৰতীয় ক্ৰিকেট দলৰ ইনষ্টাগ্ৰাম একাউন্টৰ পৰা এম. এছ.ধোনী,ভূৱনেশ্বৰ কুমাৰ,কেদাৰ যাদৱ আৰু দীনেশ কাৰ্তিকৰ ফ'টো শ্বেয়াৰ কৰা হয়।
উল্লেখ্য যে,বিশ্বকাপ ক্ৰিকেট, ২০১৯ত একমাত্ৰ দল ভাৰতেই এখনো মেচত পৰাজয়ৰ সন্মুখীন হোৱা নাই। ভাৰতে জুনৰ ৩০ তাৰিখে আয়োজক ইংলেণ্ডৰ বিৰুদ্ধে মুখামুখি হ'ব।
