স্পৰ্টছ ডেস্ক,12 জানুৱাৰীঃ ৰঞ্জী ট্ৰফী ৰ ৰাউণ্ড 5 ৰ গ্ৰুপ চি মেচত শনিবাৰৰ পৰা মুখামুখি হৈছে অসম আৰু ছত্তিছগড় ৷ গুৱাহাটীৰ বৰ্ষাপাৰা ষ্টেডিয়ামত অনুষ্ঠিত হোৱা মেচখনত টছত জয় লাভ কৰি প্ৰথমে বলিঙ কৰাৰ সিদ্ধান্ত গ্ৰহণ কৰে ঘৰুৱা দল অসমে ৷ ইপিনে প্ৰথমে বেটিঙৰ আমন্ত্ৰণ লাভ কৰি ছত্তিছগড় দলটোৰ হৈ ইনিংছৰ আৰম্ভণি কৰিবলৈ আহে আভনিছ ধালিৱাল আৰু শশাংক চাণ্ডেকাৰে ৷
অৱশ্য়ে দলটোৰ হৈ সুন্দৰ আৰম্ভণি কৰাত ব্যৰ্থ হৈ দুই খেলুৱৈ ৷ দলীয় 25 ৰান স্কৰতেই অসমে লাভ কৰিবৈল সক্ষম হয় প্ৰথমটো সফলতা ৷ কেৱল পাঁচ ৰানৰ বৰঙণি দি পেভিলিয়নলৈ উভতে শশাংক চাণ্ডেকাৰ ৷ অৰূপ দাসে এলবি ডাব্লিউ আউট কৰে শশাংকক ৷ ইয়াৰ পাচতে অসমে দ্বিতীয়টো আৰু তৃতীয়টো সফলতাও ছত্তিছগড়ৰ দলীয় 50 ৰানৰ ভিতৰতেই লাভ কৰিবলৈ সক্ষম হয় ৷ 24 ৰান কৰি আভনিছ ধালিৱাল আৰু 1 ৰান কৰি আশুতোষ সিং আউট হয় ৷ আভনিছ ধালিৱালক ৰঞ্জিত মালিয়ে আউট কৰাৰ বিপৰীতে অৰূপ দাসৰ বলত আউট হয় আশুতোষ ৷
ইয়াৰ পাচত ছত্তিছগড় দলটোক স্থিৰতা প্ৰদান কৰে হাৰপ্ৰীত সিং আৰু অমনদ্বীপ খাড়েয়ে ৷ দলটোৱে নিজৰ চতুৰ্থটো উইকেট হৰপ্ৰীত সিং ৰূপে হেৰুৱাই 126 ৰানত ৷ অৰূপ দাসৰ বলত অৰ্ধশতক অৰ্জন কৰি আউট হয় অধিনায়ক হৰপ্ৰীত সিং ৷ ইপিনে শতক অৰ্জন কৰিবলৈ সক্ষম হয় অমনদ্বীপে ৷ অৱশ্যে শতক অৰ্জনৰ কিছু সময়ৰ পাচতেই 105 ৰান কৰি ৰিয়ান পৰাগৰ চিকাৰ হয় অমনদ্বীপ ৷
দলটোৱে নিজৰ পঞ্চমটো উইকেট হেৰুৱাই 238 ৰানত ৷ ইয়াৰ পাচত দলটোৱে অতি সোনকালে আৰু দুটাকৈ উইকেট হেৰুৱাই প্ৰথম দিনটোৰ অন্তত 7 উইকেটৰ বিনিময়ত 276 ৰান কৰিবলৈ সংগ্ৰহ কৰিবলৈ সক্ষম হয় ৷
বৰ্তমান ক্ৰীজত অপৰাজিত হৈ আছে শশাংক সিং (60) আৰু সুমিত ৰুইকাৰ (4) ৷ খেলখনত অসমৰ হৈ অৰুপ দাসে 25 অভাৰত 68 ৰান দি 3 টা, ৰিয়ান পৰাগে 12 অভাৰত 44 ৰান দি 3 টা আৰু ৰঞ্জিত মালিয়ে 23 অভাৰত 65 ৰান দি 1 টাকৈ সফলতা লাভ কৰিবলৈ সক্ষম হৈছে ৷
- লগতে চাওক- অসমৰ হৈ দ্বিতীয়টো ব্ৰঞ্জ দখল উপাশা তালুকদাৰৰ
