স্পৰ্টছ ডেস্ক, 16 জুনঃ COVID-১৯ ৰ পাচত ইংলেণ্ডৰ গৃহভূমিত হ'বলগীয়া শৃংখলাৰ বাবে অনুমোদন পাকিস্তানৰ প্ৰধানমন্ত্ৰী ইমৰান খানৰ । সোমবাৰে ক্ৰিকেট সন্দৰ্ভত ইছলামাবাদত প্ৰধানমন্ত্ৰী ইমৰান খানৰ সৈতে পিচিবিৰ অধ্যক্ষ এহছান মণিৰ বৈঠকৰ পাচতেই ইংলেণ্ড ভ্ৰমণৰ বাবে পাকিস্তান ক্ৰিকেট দলক অনুমোদন জনায় প্ৰধানমন্ত্ৰীগৰাকীয়ে ।
পিচিবিৰ এক সূত্ৰৰ পৰা জানিব পৰা মতে, প্ৰধানমন্ত্ৰীয়ে মণিক উদ্দেশ্যি কয় পাকিস্তান ক্ৰিকেট দলক টেষ্ট আৰু টি-20 শৃংখলা খেলিবলৈ ইংলেণ্ডলৈ যাব লাগে । কিয়নো কৰ'ণা ভাইৰাছৰ মহামাৰীৰ মাজতো ক্ৰিকেট আৰু অন্যান্য খেলৰ গতিবিধি চাবলৈ ইচ্ছুক জনসাধাৰণ । ইয়াৰ লগতে পিচিবিক ইংলেণ্ড ভ্ৰমণলৈ যোৱা সকলো খেলুৱৈ, বিষয়াকৰ্মীৰ সুৰক্ষা বাবে ইংলেণ্ড ক্ৰিকেট ব'ৰ্ডৰ পৰা সকলো ব্যৱস্থা সুনিশ্চিত কৰিবলৈও নিৰ্দেশ প্ৰদান কৰিছে ।
অহা আগষ্ট আৰু চেপ্তেম্বৰ মাহত তিনিখন টেষ্ট আৰু তিনিখন টি-20 মেচত অৱতীৰ্ণ হ'ব পাকিস্তান দলটো । ইতিমধ্যে 29 গৰাকী খেলুৱৈ আৰু 14 গৰাকী বিষয়া কৰ্মীৰ দল ঘোষণা কৰিছে পাকিস্তান ক্ৰিকেট ব'ৰ্ডে ।
লগতে চাওকঃ ভাৰত-চীনা সৈন্যৰ সংঘৰ্ষ : গলৱান উপত্যকাত নিহত তিনি ভাৰতীয় সেনা
