স্পৰ্টছ ডেস্ক, 11 অক্টোবৰঃ ভাৰত আৰু দক্ষিণ আফ্ৰিকাৰ মাজত পুণেৰ মহাৰাষ্ট্ৰ ক্ৰিকেট এশ্ব’ছিয়েচন ষ্টেডিমায়ত অনুষ্ঠিত হৈছে তিনিখনীয়া টেষ্ট শৃংখলাৰ দ্বিতীয়খন টেষ্ট মেচ ৷ দ্বিতীয় টেষ্টৰ দ্বিতীয় দিনৰ খেলৰ অন্তত শক্তিশালী স্থিতিত ভাৰত ৷ ভাৰতৰ প্ৰথম ইনিংছৰ 601 ৰানৰ প্ৰত্যুত্তৰত দক্ষিণ আফ্ৰিকাই 15 অভাৰত 3 উইকেট হেৰুৱাই সংগ্ৰহ কৰিছে 36 ৰান ৷ ভাৰতে প্ৰথমে বেটিং কৰি 3 উইকেটৰ বিনিময়ত 601 ৰান কৰি প্ৰথম ইনিংছ ঘোষণা কৰিছিল ৷ ভাৰতৰ হৈ উমেশ যাদৱে 2 টা আৰু মহম্মদ ছামীয়ে 1 টা উইকেট দখল কৰিবলৈ সক্ষম হৈছে ৷
টছত জয়ী হৈ ভাৰতে ময়ংক আগৰৱালৰ শতক, বিৰাট কোহলিৰ দ্বি-শতকৰ বিনিময়ত বিশাল স্কৰ গঢ়িবলৈ সক্ষম হৈছিল ৷ ভাৰতৰ হৈ বিৰাট কোহলিয়ে অপৰাজিত 254 ৰান কৰাৰ বিপৰীতে ময়ংক আগৰৱালে 108 ৰানৰ শতকীয় ইনিংছ খেলে ৷ আনহাতে অজ্যিংকা ৰাহানেয়ে 59, ৰবীন্দ্ৰ জাডেজাই 91, চেতেশ্বৰ পূজাৰাই 58, ৰোহিত শৰ্মাই 14 ৰানৰ বৰঙণি যোগায় ৷
ময়ংক আগৰৱালে প্ৰথম দিনা টেষ্ট কেৰিয়াৰৰ দ্বিতীয়টো শতক অৰ্জন কৰাৰ বিপৰীতে 26 সংখ্যক শতক অৰ্জন কৰা বিৰাটে 150 ৰান সম্পূৰ্ণ কৰি অধিনায়ক হিচাপে ডন ব্ৰেডমেনৰ অভিলেখ ভংগ কৰিবলৈ সক্ষম হৈছে ৷ আনহাতে বিৰাট কোহিলৰ এইটো টেষ্ট ক্ৰিকেটৰ সপ্তমটো দ্বি-শতক ৷
