স্পৰ্টছ ডেস্ক, 6 আগষ্ট : ৱেষ্ট ইণ্ডিজৰ প্ৰাক্তন অধিনায়ক ব্ৰায়ান লাৰাই বৃহস্পতিবাৰে কৰ'ণা ভাইৰাছত আক্ৰান্ত হোৱাৰ বাতৰি অস্বীকাৰ কৰিছে ৷ প্ৰাক্তন ক্ৰিকেটাৰগৰাকীয়ে কয় যে, কৰ'ণা ভাইৰাছত তেওঁ আক্ৰান্ত হোৱাটো উৰাবাতৰি ৷ নকাৰাত্মক বাতৰি বিয়পাবলৈ মহামাৰীবিধৰ ব্যৱহাৰ কৰা অনুচিত বুলি লাৰাই মন্তব্য কৰে ৷
ইনষ্টাগ্ৰামৰ জৰিয়তে লাৰাই কয়, "মই কৰ'ণা ভাইৰাছত আক্ৰান্ত হোৱা বুলি উৰাবাতৰি প্ৰকাশ হোৱা বাবে মই এই সন্দৰ্ভত স্পষ্টীকৰণ দিব বিচাৰিছো ৷ এই বাতৰি কেৱল মিচাই নহয়, বৰ্তমানৰ মহামাৰীৰ পৰিস্থিতিত এনে উৰাবাতৰি বিয়পোৱাটোও অপকাৰক ৷"
উল্লেখ্য যে, যোৱা 24 ঘন্টাত বহুলোকে চ'ছিয়েল মিডিয়াৰ জৰিয়তে লাৰা কৰ'ণাত আক্ৰান্ত হোৱা বুলি উৰাবাতৰি বিয়পাইছিল ৷ কিন্তু, ক্ৰিকেটাৰগৰাকীয়ে জানিবলৈ দিয়ে যে, তেওঁ কৰ'ণাৰ পৰীক্ষা কৰিছিল আৰু ফলাফল নেগেটিভ লাভ কৰিছে ৷
2007 চনত আন্তৰাষ্ট্ৰীয় ক্ৰিকেটৰ পৰা অৱসৰ ঘোষণা কৰা ব্ৰায়ান লাৰাই 53 টা শতকসহ 22,358 ৰাণ সংগ্ৰহ কৰিছে ৷ 2004 চনত তেওঁ ইংলেণ্ডৰ বিৰুদ্ধে টেষ্ট ক্ৰিকেটত 400 ৰাণৰ ইনিংছ খেলিছিল ৷ এয়া টেষ্ট ক্ৰিকেট ইতিহাসৰ সৰ্বাধিক ব্যক্তিগত স্কৰ ৷
আনহাতে, প্ৰথম শ্ৰেণীৰ ক্ৰিকেটত 1994 চনত দাৰহামৰ বিৰুদ্ধে অপৰাজিতভাৱে সৰ্বাধিক 501 ৰাণৰ ইনিংছ খেলিছিল লাৰাই৷ প্ৰাক্তন ক্ৰিকেটাৰগৰাকীয়ে ৱেষ্ট ইণ্ডিজ দলৰ হৈ 131 খন টেষ্ট আৰু 299 খন এদিনীয়াত অংশগ্ৰহণ কৰিছে ৷
লগতে পঢ়ক : আইপিএল 2020 সম্পৰ্কত জানিব লগা বিভিন্ন তথ্য...
