খুমটাই, 11আগষ্টঃ খুমটাইৰ চিনাতলী শেনচোৱাৰ সুযোগ্য সন্তান বোলছবি পৰিচালক বিশ্বজিত বৰাই চিনাতলী বৰনামঘৰত সেৱা লৈ তেওঁ পৰিচালনা কৰিবলৈ লোৱা অসমীয়া বোলছবি 'লখিমী'ৰ শুভ মহুৰৎ অনুষ্ঠানৰ লগতে বিভিন্ন স্থানত দৃশ্যগ্ৰহণৰ বাবে যাত্ৰা আৰম্ভ কৰে । ইতিমধ্যে এজাক জোনাকীৰ জিলমিল, বহ্নিমান,ৰক্তবীজ,ফেহুজালী, কেইবাখনো হিন্দী ছবিৰ পৰিচালক হিচাপে জিলিকি উঠিবলৈ সক্ষম হোৱা চিনাতলীৰ সুযোগ্য সন্তান বিশ্বজিত বৰাই শেহতীয়াকৈ পৰিচালনা কৰিবলৈ লোৱা সম্পূৰ্ণ অসমীয়া গ্ৰাম্য পটভূমিৰ আধাৰত নিৰ্মাণ কৰিবলৈ লোৱা অসমীয়া বোলছবি 'লখিমী'ৰ শুভমহুৰৎ অনুষ্ঠান অনুষ্ঠিত হয় চিনাতলী বৰনামঘৰত ৷
পুৱাই চিনাতলী বৰনামঘৰত বিশ্বজিত বৰাৰ লগতে বোলছবি খনৰ লগত জড়িত সকলো শিল্পী উপস্থিত হৈ এভাগী শৰাই আগবঢ়াই বিভিন্ন স্থানত দৃশ্য গ্ৰহণৰ বাবে যাত্ৰা আৰম্ভ কৰে । শুভমহুৰৎ অনুষ্ঠানত বন্তি প্ৰজ্বলন কৰে চিনাতলী বৰনামঘৰৰ সভাপতি জিতেন বুবুল শইকীয়াই নাৰিকল ভাঙে বোলছবি পৰিচালক দিনেশ গগৈয়ে, কেমেৰা অন কৰে বিশ্বজিতৰ পিতৃ পূৰ্ণ বৰাই, সম্পূৰ্ণ গ্ৰাম্য পটভূমিত সঁচা কাহিনীৰে নিৰ্মাণ কৰা ছবিখনৰ প্ৰযোজক হিচাপে আছে বিশিষ্ট বোলছবি নিৰ্মাতা মহেশ চিৰলায়ে । বোলছবি খনত অভিনয় কৰিব অভিনেতা অৰুণ হাজৰিকা, পৃথিৰাজ ৰাভা, ৰাজিব ক্ৰৰ,অৰুণ বৰা, ইন্দ্ৰানী চেতিয়া, নায়িকাৰ চৰিত্ৰত অভিনয় কৰিব লভা আৰু নায়কৰ চৰিত্ৰত এখন নতুন মুখ দেখা পাব বুলি জনিবলৈ দিয়ে পৰিচালক বিশ্বজিত বৰাই । লগতে কয় এই ছবিখনত এক বিশেষ চৰিত্ৰত অভিনয় কৰিব অসমৰ কৃষি মন্ত্ৰী অতুল বৰাই । এই ছবিখনৰ দৃশ্যগ্ৰহণ সমূহ গোলাঘাট জিলাৰ বিভিন্ন গাওঁ সমূহত হব । এখন ভাল অসমীয়া ছবি দৰ্শকক উপহাৰ দিব বুলি বিশ্বজিত বৰাই জানিবলৈ দিয়াৰ লগতে সকলোপ্ৰকাৰৰ সহায় সহযোগ কামনা কৰিছে ।
