গুৱাহাটী, ১৮ ফেব্ৰুৱাৰীঃ ভাৰতীয় ক্ৰিকেট কিংবদন্তি তথা প্ৰাক্তন তাৰকা অলৰাউণ্ডাৰ যুৱৰাজ সিঙৰ জীৱনৰ আধাৰত এক ৱেব ছিৰিজ নিৰ্মাণ কৰিবলৈ লৈছে গুৱাহাটীৰ আগশাৰীৰ প্ৰযোজক সংস্থা ড্ৰীম হাউছ প্ৰডাকছনে । এই ৱেব ছিৰিজটোত যুৱৰাজ সিঙৰ লগতে যুৱৰাজ সিঙৰ ভাতৃ জোৰাৱৰ সিঙেও অভিনয় কৰিব ৷
উল্লেখ্য যে, ড্ৰীম হাউছ প্ৰডাকছন প্ৰাইভেট লিমিটেড হৈছে পূৱ ভাৰতৰ এক আগশাৰীৰ প্ৰযোজনা সংস্থা আৰু একাধিক ন ন প্ৰকল্পৰে ৰাষ্ট্ৰীয় আৰু আন্তঃৰাষ্ট্ৰীয় প্ৰেক্ষাপটতো শক্তিশালী খোজ পেলাবলৈ সাজু হৈছে । এই ন ন প্ৰকল্পসমূহৰে অন্যতম হৈছে প্ৰাক্তন তাৰকা ক্ৰিকেটাৰ যুৱৰাজ সিং আৰু তেওঁৰ ভাতৃ জোৰাৱৰ সিঙৰ জীৱনৰ আধাৰত নিৰ্মাণ কৰিবলৈ লোৱা এই ৱেব ছিৰিজটো ৷
জোৰাৱৰ সিঙে এই ৱেব ছিৰিজটোত মুখ্য চৰিত্ৰত অভিনয় কৰিব । ক্ৰিকেটাৰ যুৱৰাজ সিং আৰু ভাৰতীয় প্ৰথম শ্ৰেণীৰ ক্ৰিকেটাৰ জোৰাৱৰ সিঙৰ সমগ্ৰ জীৱন বৃত্তান্ত সামৰি প্ৰস্তুত কৰা এই ৱেব ছিৰিজটোত ক্ৰিকেটাৰ দুগৰাকীৰ মাতৃ চবনম সিঙো জড়িত থাকিব ৷
উল্লেখ্য যে, এই ৱেব ছিৰিজটোত দেখা যাব যুৱৰাজ সিঙৰ পত্নী হেজল কীচ্ছকো । হেজল হৈছে ব্ৰিটিছ মৰিছাছ ছবি অভিনেত্ৰী তথা এগৰাকী প্ৰতিষ্ঠিত মডেল, তদুপৰি শেহতীয়াকৈ বিভিন্ন ভাৰতীয় টেলিভিছন অনুষ্ঠান তথা ছবিত দেখা গৈছে হেজল কীচ্ছক। ছলমান খান অভিনীত বডিগাৰ্ড ছবিত দেখা গৈছিল যুৱৰাজ পত্নী হেজলক। ইফালে ২০১৩ চনত বিগ বছ ৭ তো দেখা গৈছিল হেজল কীচ্ছক ৷
এই ৱেব ছিৰিজটোত অসমৰ বিভিন্ন ক্ষেত্ৰৰ প্ৰতিভাসকলক সুযোগ প্ৰদান কৰি প্ৰতিভা বিকাশৰ মঞ্চ প্ৰদান কৰা হ’ব । উল্লেখ্য যে, প্ৰথমবাৰৰ বাবে অসমৰ কোনো প্ৰডাকছনে এগৰাকী ৰাষ্ট্ৰীয় ব্যক্তিত্বৰ জীৱনৰ আধাৰত ৱেব ছিৰিজ নিৰ্মাণ কৰিবলৈ লৈছে । ইফালে বলীউডৰ জনপ্ৰিয় লেখক তথা অক্ষয় কুমাৰৰ অনাগত ছবি বচ্ছন পাণ্ডেৰ চিত্ৰনাট্যকাৰ বিপিন উনিয়ালেও এই প্ৰকল্পটোত যোগদান কৰিছে। তদুপৰি বলীউডৰ ভালেমান জনপ্ৰিয় অভিনেতা অভিনেত্ৰীয়েও এই প্ৰকল্পটোৰ সৈতে জড়িত হোৱাৰ সম্ভাৱনা আছে ।
লগতে পঢ়কঃ তাপসী পান্নুৱে অভিনয় কৰিব হিন্দী ৰূপান্তৰণ ৰাণ ল'লা ৰাণত
