অবৈধ মাৰনাস্ত্ৰৰ সৈতে তেজপুৰত আটক এজন

তেজপুৰত বন্দুকসহ আটক এজন লোক ৷

তেজপুৰ, 2 ছেপ্টেম্বৰ : তেজপুৰ আৰক্ষীয়ে মাৰনাস্ত্ৰসহ গ্ৰেপ্তাৰ কৰিছে নগাঁও জিলাৰ ৰূপহীৰ এজন যুৱক ৷ তেজপুৰ সদৰ আৰক্ষীৰ নগৰ ইন্সপেক্টৰ প্ৰাঞ্জল শইকীয়াৰ নেতৃত্বত যোৱা এটা আৰক্ষীৰ দলে গোপন সুত্ৰৰ পম খেদি তেজপুৰ কলিয়াভোমোৰা সেতুৰ সমীপত 7.65 mm পিষ্টল আৰু 6 জাঁই সজীৱ গুলীসহ গ্ৰেপ্তাৰ কৰে আনিছুৰ জামান নামৰ যুৱকজনক ৷

নগাঁও জিলাৰ হেওৰাপট্টিৰ কদম আলি আৰু দিলদাৰ হুছেইন নামৰ লোকদুজনৰ সৈতে এখন Celerio গাড়ীত আহি আনিচুৰ পিষ্টলসহ নামে কলিয়াভোমোৰাৰ চুলুং অঞ্চলত ৷ আনিচুৰে এই পিস্তলটো আৰু সজীৱ গুলি তেজপুৰ দোলাবাৰীৰ হাজিবুল নামৰ এজন যুৱকক দিবলৈ অহা বুলি স্বীকাৰ কৰিছে ৷ ধৃত আনিচুৰ অবৈধ মাৰনাস্ত্ৰ ব্যৱসায়ৰ সৈতে জড়িত নে সৰবৰাহকাৰী সেই কথা এতিয়াও পোহৰলৈ অহা নাই ৷ ইফালে ৰূপহীৰ পৰা তেজপুৰলৈ কিদৰে অবৈধ মাৰনাস্ত্ৰ কঢ়িয়াই আনিব পাৰিলে সেয়াও ৰহস্যজনক ৷ আনহাতে তেজপুৰ দোলাবাৰীৰ হাজিবুল নামৰ যিজন যুৱকক এই মাৰনাস্ত্ৰ যোগানৰ বাবে আহিছিল এই পৰ্যন্ত তেওঁকো আৰক্ষীয়ে গ্ৰেপ্তাৰ কৰিব পৰা নাই ৷

লগতে পঢ়ক : বিএছএফৰ অভিযানত জব্দ লক্ষাধিক মূল্যৰ বাৰ্মিজ চিগাৰেট