গোলাঘাট, 18 আগষ্টঃ গোলাঘাট জিলাৰ বৰপথাৰৰ যুৱ ব্যৱসায়ী ইফটিকাৰ আহমেদৰ হত্যাকাণ্ডৰ নতুন তথ্য পোহৰলৈ আহিছে । ইতিমধ্যে যুৱক জনৰ হত্যাকাণ্ডত জড়িত দুজনক নুমলীগড়ত গ্ৰেপ্তাৰ কৰে আৰক্ষীয়ে । তাৰোপৰি আৰক্ষীয়ে উদ্ধাৰ কৰিছে ইফটিকাৰৰ ম'বাইল আৰু বাইক।
গোলাঘাট জিলাৰ বৰপথাৰৰ ব্যৱসায়ী মঃ ইফটিকাৰক ১৩ আগষ্টত দুৰ্বৃত্তই অপহৰণ কৰি হত্যা কৰিছিল । ইতিমধ্যে যুৱকজনক হত্যাকাণ্ডত জড়িত দুজন অভিযুক্তক নুমলীগড়ৰ মুৰফুলনীত আটক কৰিবলৈ সক্ষম হয় আৰক্ষীয়ে । গোলাঘাটৰ মুৰফুলনী অঞ্চলত পৰিত্যক্ত অৱস্থাত উদ্ধাৰ হোৱা এখন বাইকৰ পম খেদি বগীজান আৰক্ষীয়ে নুমলীগড়ৰ কাষৰীয়া ১নং কৌৱানীৰ পৰা আটক কৰে দুজন অভিযুক্তক ৷ ধৃত লোক দুজন সঞ্জয় কেৰ্কেটা আৰু আৰবেল কেৰ্কেটা বুলি জানিব পৰা গৈছে ৷
উল্লেখ্য যে, ইফটিকাৰৰ অপহৰণ আৰু হত্যাৰ লগত জড়িত থকাৰ অভিযোগত বগীজান আৰক্ষীয়ে আটক কৰি ধৃত লোক দুজনক বৰপথাৰ আৰক্ষীক চমজাই দিয়ে । ইফালে আৰক্ষীয়ে ইফটিকাৰ আহমেদে ব্যৱহাৰ কৰা বাইক আৰু ম'বাইল ধৃত সঞ্জয়ৰ ঘৰৰ পৰা উদ্ধাৰ কৰিবলৈ সক্ষম হয় । ইতিমধ্যে অধিক তথ্যৰ বাবে আৰক্ষীয়ে আৰম্ভ কৰিছে তীব্ৰ অভিযান ৷
লগতে পঢ়ক- গোলাঘাটত আৰক্ষীৰ জালত চাৰিটাকৈ গভাইত চোৰ
