ইণ্টাৰনেশ্যনেল ডেস্ক, ১৩ ডিচেম্বৰ : পাকিস্তানৰ প্ৰাক্তন প্ৰধানমন্ত্ৰী তথা পিটিআই নেতা ইমৰান খানে কৈছে যে ভাৰতৰ উচ্চতম ন্যায়ালয়ৰ অনুচ্ছেদ ৩৭০ বাতিল বাহালৰ ৰায়ে কাশ্মীৰ সমস্যাক অধিক জটিল কৰি তুলিব ।
উল্লেখ্য যে উচ্চতম ন্যায়ালয়ে সোমবাৰে জম্মু-কাশ্মীৰ ৰাজ্যক বিশেষ মৰ্যাদা প্ৰদান কৰা অনুচ্ছেদ ৩৭০ বাতিল কৰাৰ কেন্দ্ৰীয় চৰকাৰৰ ২০২৯ চনৰ আগষ্ট মাহৰ সিদ্ধান্তক সৰ্বসন্মতিক্ৰমে বাহাল ৰাখে । এই সন্দৰ্ভত প্ৰতিক্ৰিয়া ব্যক্ত কৰি ৰাৱালপিণ্ডিৰ আদিয়ালা কাৰাগাৰত বন্দী হৈ থকা ইমৰান খানে এক বাৰ্তাত কয় যে ভাৰতীয় শীৰ্ষ ন্যায়ালয়ৰ ৰায়টো ৰাষ্ট্ৰসংঘৰ নিৰাপত্তা পৰিষদৰ প্ৰস্তাৱৰ সম্পূৰ্ণ উলংঘন । তেওঁৰ দল পাকিস্তান তেহৰিক-ই-ইনচাফৰ এক্স হেণ্ডেলত কৰা এটা পোষ্টত এনেদৰে কয় ।
ইমৰান খানে লগতে স্পষ্ট কৰি দিয়ে যে ভাৰতীয় শীৰ্ষ আদালতৰ বিতৰ্কিত আৰু বেআইনী সিদ্ধান্তই দশকজোৰা সংঘাত সমাধানত সহায় কৰাৰ পৰিৱৰ্তে কাশ্মীৰ সমস্যাক অধিক জটিল কৰি তুলিব । আনহাতে, তেওঁৰ দলে কাশ্মীৰী লোকসকলক সম্পূৰ্ণ কূটনৈতিক, নৈতিক আৰু ৰাজনৈতিক সমৰ্থন আগবঢ়াই যাব বুলিও তেওঁ প্ৰতিশ্ৰুতি দিয়ে ।
পাকিস্তান তেহৰিক-ই-ইনচাফৰ (পিটিআই) আজীৱন অধ্যক্ষ হিচাপে দায়িত্ব লাভ কৰা ইমৰান খানে স্মৰণ কৰে যে কাশ্মীৰ সমস্যা হৈছে পাকিস্তান আৰু ভাৰতৰ মাজত বিবাদৰ মুখ্য কাৰণ । তেওঁ এই কথাও জোৰ দি কয় যে ২০১৯ চনত ভাৰতে কাশ্মীৰৰ বিশেষ মৰ্যাদা সলনি কৰিবলৈ চেষ্টা কৰাৰ সময়ত তেওঁৰ নেতৃত্বত তদানীন্তন পিটিআই চৰকাৰে তীব্ৰ প্ৰতিক্ৰিয়া প্ৰকাশ কৰিছিল । লগতে তেওঁ দ্বিপাক্ষিক কূটনৈতিক সম্পৰ্ক হ্ৰাস হোৱাৰ কথাও উল্লেখ কৰিছিল ।
ইমৰান খানে লগতে কয় যে তেওঁ ৰাষ্ট্ৰীয় স্বাৰ্থক প্ৰথম স্থান দিয়াৰ সময়ত ভাৰতৰ সৈতে ভাল সম্পৰ্ক স্থাপন কৰিব বিচাৰিছিল । অৱশ্যে ৫ আগষ্ট, ২০১৯ চনৰ পিছত সেয়া সম্ভৱ হোৱা নাছিল । কিয়নো কাশ্মীৰী জনসাধাৰণৰ আশা-আকাংক্ষাৰ সৈতে আপোচ কৰিব বিচৰা নাছিল বুলি তেওঁ উল্লেখ কৰে ।
লগতে পঢ়ক :সঠিক ভাৰসাম্য বজাই ৰখাটোৱে আমাৰ প্ৰত্যাহ্বান; যুদ্ধবিৰতিৰ সপক্ষে ভাৰত ভোটদান সন্দৰ্ভত কম্বোজ
