ইণ্টাৰনেশ্যনেল ডেস্ক,১৯ অক্টোবৰ : শেহতীয়াকৈ গাজাৰ আল-আহলি চিকিৎসালয়ত হোৱা বিস্ফোৰণক লৈ বিশ্বজুৰি বিতৰ্ক অব্যাহত আছে । ইজৰাইলে দাবী কৰা মতে এয়া পেলেস্তাইনী সন্ত্ৰাসবাদীয়ে সংঘটিত কৰিছে । আনহাতে হামাছে এই বিস্ফোৰণৰ বাবে ইজৰাইলক জগৰীয়া কৰিছে । অৱশ্যে এই বিতৰ্কবোৰৰ মাজত আমেৰিকা যুক্তৰাষ্ট্ৰৰ গুৰুত্বপূৰ্ণ ঘোষণা । আমেৰিকাই মূল্যায়ন কৰিছে যে গাজাৰ চিকিৎসালয়ত হোৱা আক্ৰমণৰ বাবে ইজৰাইল দায়ী নহয় ।
হোৱাইট হাউচৰ ৰাষ্ট্ৰীয় নিৰাপত্তা পৰিষদৰ মুখপাত্ৰ এড্ৰিয়েন ৱাটছনে এক বিবৃতিত কয় যে গাজা ষ্ট্ৰিপৰ আল আহলি চিকিৎসালয়ত সংঘটিত এক বিস্ফোৰণত শ শ নাগৰিক নিহত হোৱাৰ বাবে ইজৰাইল দায়ী নহয় বুলি আমেৰিকা চৰকাৰে মূল্যায়ন কৰিছে ।
উপলব্ধ প্ৰতিবেদনৰ ওপৰত নিৰ্ভৰ কৰিয়ে আমেৰিকাই এই মূল্যাঙ্কন কৰিছে । তাৰ ভিতৰত আছে বুদ্ধিমত্তা, মিছাইল কাৰ্যকলাপ, ছবি আৰু ঘটনাটোৰ মুক্ত উৎস ভিডিঅ' আৰু ছবি । চোৰাংচোৱা প্ৰতিবেদনৰ উদ্ধৃতি দি ৱাটছনে কয় যে গাজা ষ্ট্ৰিপৰ কিছুমান পেলেস্তাইনী সন্ত্ৰাসবাদীয়ে সন্দেহ কৰিছে যে পেলেস্তাইনী ইছলামিক জিহাদ (পিআইজে)ৰ দ্বাৰা কৰা এক ভুল ৰকেট বা মিছাইল উৎক্ষেপণৰ ফলতে এই বিস্ফোৰণ সংঘটিত হোৱাৰ সম্ভাৱনা আছে ।
আমেৰিকাৰ ৰাষ্ট্ৰপতিয়েও এই কথা পূৰ্বে স্বীকাৰ কৰিছে । অৱশ্যে সেইটো পিআইজেৰ ৰকেট আছিল নে নাই তাক নিশ্চিত কৰিবলৈ কাম কৰি থকা হৈছে বুলি তেওঁ উল্লেখ কৰে । মঙলবাৰে নিশা বিস্ফোৰণৰ আঁৰত কোন আছিল সেই বিষয়ে বিভিন্ন দাবী আছে কিন্তু অঞ্চলটোত প্ৰতিবাদ দ্ৰুতগতিত বৃদ্ধি পাইছে । বহুতো আৰৱ নেতাই ইয়াৰ বাবে ইজৰাইলক দোষাৰোপ কৰিছে ।
বিস্ফোৰণটোৰ পাছতে গাজাত হামাছৰ বিষয়াসকলে ইজৰাইলৰ এয়াৰষ্ট্ৰাইকক দোষাৰোপ কৰিছিল । অৱশ্যে ইজৰাইলে ইয়াক অস্বীকাৰ কৰিছে আৰু প্ৰমাণ হিচাপে বিভিন্ন ভিডিঅ', অডিঅ' আৰু অন্যান্য তথ্য মুকলি কৰিছে । ইজৰাইলে দাবী কৰা মতে গাজাত সক্ৰিয় হৈ থকা সন্ত্ৰাসবাদী সংগঠন ইছলামিক জিহাদৰ ৰকেট মিছফায়াৰৰ ফলত বিস্ফোৰণ হৈছিল । অৱশ্যে ইছলামিক জিহাদে সেই দাবী খাৰিজ কৰিছে ।
ইফালে চমু ইজৰাইল ভ্ৰমণৰ সময়ত বিডেনে ইজৰাইলৰ প্ৰতি আমেৰিকাৰ সমৰ্থন দেখুওৱাৰ মাজত ভাৰসাম্য বজাই ৰাখিবলৈ চেষ্টা কৰিছে । আনহাতে আৰৱ মিত্ৰশক্তিৰ মাজত বৰ্ধিত সতৰ্কতাও বজাই ৰাখিছে । জ' বিডেনে ইজৰাইলত উপস্থিত হৈ গাজাৰ নাগৰিকসকলৰ দুখ-কষ্টৰ বাবে উদ্বেগ প্ৰকাশ কৰিছে । বিডেনে কৈছে যে চিকিৎসালয়ৰ বিস্ফোৰণটোত ইজৰাইল জড়িত নহয় ।
লগতে পঢ়ক :UN to vote on Gaza resolution : গাজা প্ৰস্তাৱৰ ওপৰত অনুষ্ঠিত হ'ব ৰাষ্ট্ৰসংঘৰ ভোটগ্ৰহণ
