ইন্টাৰনেশ্যনেল ডেস্ক , 3 জানুৱাৰী : সোমবাৰে জাপানত ৰিখটাৰ স্কেলত 7.5 প্ৰাৱল্যৰ প্ৰৱল ভূঁইকপে জোঁকাৰি যোৱাৰ পাচত বিস্তৰ ক্ষতি সাধন হৈছে দেশখনৰ বিভিন্ন চহৰ ৷ বৰভূঁইকপৰ ফলত নিহতৰ সংখ্যাও বৃদ্ধি পাইছে ৷ জাপানৰ সংবাদমাধ্যম এন এইচ কে ৱৰ্ল্ডে ইশিকাৱা প্ৰিফেকচাৰৰ বিষয়াসকলৰ উদ্ধৃতি দি কয় যে, সোমবাৰে দেশখনক হোৱা 7.5 প্ৰাৱল্যৰ ভূমিকম্পৰ ফলত মৃত্যু হোৱা লোকৰ সংখ্যা এতিয়া 57 লৈ বৃদ্ধি পাইছে । প্ৰৱল ভূমিকম্পটোৱে ইশিকাৱাৰ কেন্দ্ৰীয় প্ৰান্তৰ নোটো উপদ্বীপক জোকাৰি গৈছিল ৷
ভূমিকম্পৰ পিছত 24 ঘণ্টাতকৈও অধিক সময়ৰ বাবে নোটো উপদ্বীপৰ উত্তৰ অঞ্চলটোলৈ পৰ্যটকক যোৱাত কিছু বাধা প্ৰদান কৰা হৈছিল ৷ ইফালে, ভূমিকম্পৰ ফলত ছুনামি হ’ব পাৰে বুলি সতৰ্কতা জাৰি কৰিছিল জাপানৰ বতৰ বিজ্ঞান সংস্থাই ৷ মঙলবাৰে জাপান বতৰ বিজ্ঞান সংস্থাই দেশখনৰ পশ্চিম উপকূলৰ কিছু অংশত সম্ভাৱনা থকা সকলো ছুনামি পৰামৰ্শ বাতিল কৰে ।
দেশখনৰ অগ্নি নিৰ্বাপক বিভাগৰ বিষয়াসকলে জনোৱা অনুসৰি, ৱাজিমা চহৰত ঘৰসহ 25 টা অট্টালিকা খহি পৰিছে ৷ এন এইচ কে ৱৰ্ল্ডে জনোৱা অনুসৰি, ভূমিকম্পৰ পাছতে ৱাজিমা চহৰৰ মূল কেন্দ্ৰত থকা কাৱাই টাউনত সোমবাৰে সংঘটিত হোৱা অগ্নিকাণ্ডত বিস্তাৰৰ ক্ষতি হৈছে ৷ অগ্নিনিৰ্বাপক বাহিনীয়ে বৰ্তমানেও জুই নিৰ্বাপনৰ চেষ্টা কৰি আছে ৷ বৰ্তমানলৈকে ব্যৱসায় প্ৰতিষ্ঠান আৰু ঘৰসহ প্ৰায় 200 টা অট্টালিকা জুইত জাহ গৈছে ৷ উক্ত চহৰখন পৰ্যটনস্থলীৰ বাবে জনাজাত আছিল ।
আমেৰিকা যুক্তৰাষ্ট্ৰৰ ভূতাত্ত্বিক জৰীপে জনাইছে যে, ভূমিকম্পটো সোমবাৰে স্থানীয় সময় অনুসৰি বিয়লিৰ ভাগত প্ৰায় 4.10 বজাত ইশিকাৱা প্ৰান্তৰ নোটো উপদ্বীপত 10 কিলোমিটাৰ গভীৰতাত হৈছিল ৷
লগতে পঢ়ক : জাপানত ভূমিকম্পত নিহত ৩০, ছুনামিৰ সতৰ্কবাণী
