ইণ্টাৰনেশ্যনেল ডেস্ক, ২৩ অক্টোবৰ : উত্তৰ-পশ্চিম ছিৰিয়াত আমেৰিকা যুক্তৰাষ্ট্ৰ(US)ৰ এয়াৰ ষ্ট্ৰাইক(Airstrike) । এই আক্ৰমণত নিহত হ'ল আল কায়দাৰ এজন শীৰ্ষ নেতা আব্দুল হামিদ আল-মাটাৰ । শুকুৰবাৰে কেন্দ্ৰীয় কমাণ্ডৰ মুখপাত্ৰ মেজৰ জন ৰিগছবীয়ে নিশ্চিত কৰে এই কথা । ৰিগছবীয়ে কয় যে, mq-9 এয়াৰ ক্ৰাফ্টেৰে কৰা এই আক্ৰমণত সাধাৰণ নাগৰিকৰ মৃত্যু হোৱা নাই ।
বিবৃতিত উল্লেখ থকা অনুসৰি, আল-কায়দাই আমেৰিকা আৰু মিত্ৰশক্তিৰ বাবে ভাবুকি দি আহিছে । লগতে বিবৃতিত উল্লেখ কৰা হৈছে যে, আল-কায়দাই নিজৰ সংগঠনক পুনৰ শক্তিশালী কৰা, আন সহযোগী সংগঠনৰ সৈতে সমন্বয় গঢ়ি তোলা আৰু সন্ত্ৰাসবাদী কাৰ্য-কলাপৰ পৰিকল্পনা কৰাৰ বাবে ছিৰিয়াক এক সুৰক্ষিত ঠাই হিচাপে ব্যৱহাৰ কৰে । আল-কায়দাৰ এই শীৰ্ষ নেতাজনৰ মৃত্যুৱে পাচত সন্ত্ৰাসবাদী সংগঠনটোত মোক্ষম আঘাত হানিব । আমেৰিকা যুক্তৰাষ্ট্ৰৰ নাগৰিকৰ ওপৰত আক্ৰমণৰ আশংকাও হ্ৰাস পাব বুলি আশা কৰা হৈছে ।
লগতে বিশ্বৰ আন দেশত সংগঠনটোৱে আক্ৰমণ কৰাৰ বাবে যুগুত কৰা পৰিকল্পনাতো যথেষ্ট প্ৰভাৱ পৰিব বুলি বিবৃতিটোত কোৱা হৈছে । মাতৃভূমিৰ ক্ষতি কৰিব বিচৰা আল-কায়দা আৰু আন সন্ত্ৰাসবাদী সংগঠনৰ সদস্যসকলৰ বিৰুদ্ধে এনে আক্ৰমণ আমেৰিকা যুক্তৰাষ্ট্ৰই অব্যাহত ৰাখিব বুলিও বিবৃতিটোত কোৱা হৈছে ।
উল্লেখ্য যে, যোৱা ২০ ছেপ্টেম্বৰত ছিৰিয়াৰ ইদলিবৰ ওচৰত আমেৰিকা যুক্তৰাষ্ট্ৰই কৰা ড্ৰোণ আক্ৰমণত আল কায়দাৰ শীৰ্ষ নেতা ছেলিম আবু আহমেদৰ মৃত্যু হৈছিল । আল কায়দাই কৰা আক্ৰমণৰ পৰিকল্পনা, পুঁজি সংগ্ৰহ, স্থানীয় অঞ্চলত কৰা আক্ৰমণৰে জড়িত আছিল ছেলিম আবু আহমেদ । ইয়াৰ পূৰ্বে, যোৱা ১৩ ছেপ্টেম্বৰত আমেৰিকা যুক্তৰাষ্ট্ৰৰ বায়ু সেনাৰ এখন সামৰিক বিমানে চিৰিয়া-ইৰাক সীমান্তত দুখন বাহনত আক্ৰমণ কৰিছিল । আল কায়দাৰ ভেটি সম্পূৰ্ণৰূপে উৎখাত কৰিবলৈ আমেৰিকাই চেষ্টা অব্যাহত ৰাখিছে ।
লগতে পঢ়ক: চীনত নতুনকৈ পুনৰ পোহৰলৈ আহিছে ক’ভিড 19 সংক্ৰমণৰ ঘটনা
