নিউজ ডেস্ক, ১৩ জুলাই: ৰাষ্ট্ৰখনৰ প্ৰান্তীয় কাউঞ্চিলৰ এগৰাকী সদস্য তথা প্ৰবক্তা ইউচুফ আয়ুবীয়ে সদৰি কৰা মতে,তালিবানী বিদ্ৰোহীয়ে দেওবাৰে নিশা কৰা এই ভয়াৱহ আক্ৰমণত ৫ জন আৰক্ষীৰ লোক আৰু ৪ জন সাধাৰণ নাগৰিকৰ ঘটনাস্থলীতে মৃত্যু ঘটিছে । প্ৰায় ১২ জনীয়া তালিবানী বিদ্ৰোহীৰ এই দলটোৱে আৰক্ষী থানাকে ধৰি চৰকাৰী কাৰ্যালয়ত আক্ৰমণৰ চেষ্টা কৰিছিল। স্থানীয় প্ৰশাসনৰ এটা সূত্ৰৰ পৰা পোৱা তথ্য মতে,সোমবাৰে পুৱালৈকে চলা এই সংঘৰ্ষত ৬ জন তালিবানী বিদ্ৰোহী নিহত হোৱাৰ লগতে গুৰুতৰ ভাৱে আহত বাকী বিদ্ৰোহী সমূহে সেইস্থান ত্যাগ কৰি পলায়ন কৰিবলৈ সক্ষম হয় ।
ৰাষ্ট্ৰখনৰ প্ৰান্তীয় কাউঞ্চিলৰ প্ৰৱক্তা গৰাকীৰ উদ্ধৃতিত প্ৰকাশ পোৱা আন এক তথ্য মতে, চুবুৰীয়া আন এক প্ৰান্ত বদখচানতো এখন তালাচী চকীত তালিবানী বিদ্ৰোহীয়ে চলালে আন এক ভয়াৱহ আক্ৰমণ । তালাচী চকীখনৰ আৰক্ষীয়েও ইয়াৰ প্ৰত্যুত্তৰ দিয়াত দুয়োপক্ষৰ সংঘৰ্ষত ৭জনকৈ আৰক্ষীৰ লোক আৰু ৫জন তালিবানী বিদ্ৰোহীৰ মৃত্যু ঘটাৰ লগতে ২জন আৰক্ষী আহত হৈছে ।
প্ৰৱক্তাগৰাকীয়ে উল্লেখ কৰিছে যে,পাৰ্বত্য জিলাখনৰ অতিকে গুৰুত্বপূৰ্ণ এই তালাচী চকীত আক্ৰমণৰ সময়ত আক্ৰমণকাৰী তালিবানী বিদ্ৰোহীৰ সদস্যৰ দলটোত আছিল বহুকেইজন বিদেশীও । উল্লেখ্য যে,এই দুই প্ৰান্তত বহু বছৰ ধৰি তালিবানী আৰু সুৰক্ষা বাহিনীৰ মাজত প্ৰায়েই এনে ধৰণৰ সংঘৰ্ষ হৈ আহিছে ।
চলিত বৰ্ষৰ ফেব্ৰুৱাৰী মাহত তালিবান আৰু আমেৰিকাৰ মাজত শান্তিপূৰ্ণ বুজাবুজিৰ চুক্তি সম্পাদন হোৱাৰ পাছত আফগানিস্তানৰ ৰাষ্ট্ৰপতি আশ্ৰফ গনীৰ লগতে দেশখনৰ নেতাসকলে তালিবানক হিংসা পৰিহাৰ কৰিবলৈ আহ্বান জনাইছিল । কিন্তু তালিবানী বিদ্ৰোহীয়ে এই আহ্বানক নেউচি অধিক আক্ৰমণাত্মক হোৱাহে পৰিলক্ষিত হৈছে ।
লগতে পঢ়কঃ অপৰিৱৰ্তিত অৱস্থাত গোৱালপাৰাৰ বান পৰিস্থিতি
