ইন্টাৰনেশ্যনেল ডেস্ক, 9 মাৰ্চ : সোমবাৰে ৰাষ্ট্ৰপতি ভৱনত আফগান ৰাষ্ট্ৰপতি আশ্ৰাফ ঘানীৰ শপত গ্ৰহণ অনুষ্ঠানৰ সময়তে সংঘটিত হয় দুটাকৈ বোমা বিস্ফোৰণ আৰু গুলীয়াগুলিৰ ঘটনা ৷ ৰাষ্ট্ৰপতি ঘানীয়ে উপস্থিত দৰ্শকক উদ্দেশ্যি বক্তৃতা প্ৰদান কৰি থকাৰ সময়তে এই ঘটনা সংঘটিত হয় ৷ বিস্ফোৰণৰ শব্দ শুনাৰ পাচতো ঘানীয়ে মঞ্চ ত্যাগ নকৰিলে ৷
উল্লেখ্য যে, সোমবাৰে ৰাষ্ট্ৰপতি ঘানীয়ে দ্বিতীয়বাৰৰ বাবে আফগানিস্তানৰ ৰাষ্ট্ৰপতি হিচাপে শপত গ্ৰহণ কৰে ৷ ইয়াৰোপৰি, তেওঁৰ মুখ্য কাৰ্যনিৰ্বাহক আব্দুল্লা আব্দুল্লাইও ৰাষ্ট্ৰপতীয় নিৰ্বাচনত জয়লাভ কৰা বুলি দাবী কৰাৰ লগতে নিজাববীয়াকৈ শপত গ্ৰহণ অনুষ্ঠানৰ আয়োজন কৰে ৷
ইতিমধ্যই এই বোমা বিস্ফোৰণৰ ঘটনাৰ দায়িত্ব স্বীকাৰ কৰিছে ইছলামিক সংগঠনে ৷
2019 চনৰ ছেপ্তেম্বৰতে অনুষ্ঠিত হোৱা নিৰ্বাচনৰ ফলাফল ঘোষণা কৰা হৈছিল এই বছৰৰ ফেব্ৰুৱাৰীত ৷ নিৰ্বাচনত বাধা জন্মাবৰ বাবে বহুকেইটা তালিবানী আক্ৰমণ সংঘটিত কৰাৰ পৰিপেক্ষিতত প্ৰায় পাঁচ মাহৰ অন্তত নিৰ্বাচনৰ ফলাফল ঘোষণা কৰা হয় ৷
ডিচেম্বৰতে প্ৰাৰম্ভিক পৰ্যায়ৰ নিৰ্বাচনী ফলাফল ঘোষণা কৰি ঘানীক জয়ী কৰোৱা হৈছিল আৰু আব্দুল্লা আব্দুল্লাই লাভ কৰিছিল 1.8 মিলিয়ন ভোটাৰৰ 39 শতাংশ ভোট ৷
কিন্তু বিৰোধী দলে ইয়াৰ বিৰোধিতা কৰাৰ লগতে তালিবানৰ সৈতে আমেৰিকা শান্তি চুক্তিত ৰাজনৈতিক সংকট সৃষ্টি কৰাৰ ভীতি প্ৰদৰ্শন কৰে৷ ইয়াৰ পাচতে Independent Election Commission (IEC) য়ে ফেব্ৰুৱাৰীত ঘানীক জয়ী ঘোষণা কৰে ৷
আৰু পঢ়ক : জম্মু-কাশ্মীৰৰ ৰাজনৈতিক নেতাৰ মুক্তিৰ দাবী বিৰোধী দলৰ
