ইণ্টাৰনেশ্যনেল ডেস্ক, ১৯ আগষ্ট: অৱশেষত দেশবাসীৰ ওচৰত কৈফিয়ৎ দিলে আফগানিস্তান(Afghanistan)ৰ ৰাষ্ট্ৰপতি আশ্ৰফ ঘানি(Ashraf Ghani)এ । বুধবাৰে এক ভিডিঅ' বাৰ্তাৰ জৰিয়তে পলায়নৰ কাৰণ বৰ্ণনা কৰে ঘানিয়ে । তালিবানে আফগানিস্তাৰ এখনৰ পাচত আনখন মুখ্য চহৰ, গ্ৰামাঞ্চল দখল কৰি কাবুলৰ দিশে আগবাঢ়ি অহাৰ সময়তে দেশবাসীক এক ভয়ংকৰ সংকটৰ মাজতে এৰি ঘানি পলায়ন কৰিছিল ।
বুধবাৰে ভিডিঅ' বাৰ্তাৰ জৰিয়তে তেওঁ কয় যে, দেশখনত অধিক হিংসাত্মক পৰিস্থিতি সৃষ্টি হোৱা অথবা সাধাৰণ লোকৰ তেজেৰে দেশ ৰাঙলী হোৱাত বাধা দিয়াৰ বাবে তেওঁ পলায়ন কৰাটোৱেই একমাত্ৰ উপায় আছিল । আনহাতে, তাজিকিস্তানত থকা আফগানিস্তানৰ ৰাষ্ট্ৰদূতে অভিযোগ তুলিছে যে, ঘানিয়ে দেশৰ ৰাজকোষৰ পৰা বহু মিলিয়ন ডলাৰ চুৰি কৰি নিছে । কিন্তু, ঘানিয়ে এই অভিযোগ নস্যাৎ কৰিছে ।
ভিডিঅ'টোত তেওঁ কয় যে, চিৰিয়া আৰু য়েমেনৰ দৰে কাবুল অধিক ৰক্তাক্ত হোৱাটো তেওঁ বিচৰা নাছিল । সেয়েহে তেওঁ কাবুল ত্যাগৰ সিদ্ধান্ত লৈছিল ।
ঘানিয়ে লগতে কয় যে, যদি তেওঁ আফগানিস্তানৰ ৰাষ্ট্ৰপতি হৈ থাকিলহেতেন, বহু লোক ফাঁচীকাঠত ওলমিবলগীয়া হ'লহেতেন । এয়া আফগানিস্তানৰ ইতিহাসৰ এক ভয়ংকৰ সংকট হিচাপে চিহ্নিত হ'লহেতেন । তেওঁ কয় যে, তেওঁ সন্মানীয় মৃত্যুক ভয় নকৰে আৰু আফগানিস্তানক অসন্মান কৰাটো তেওঁৰ বাবে গ্ৰহণযোগ্য নাছিল । কিন্ত পৰিস্থিতিয়ে তেওঁ দেশ এৰিবলৈ বাধ্য কৰালে ।
তেওঁ কয় যে, আফগানিস্তান ধ্বংস, দেশখন আৰু বহু লোকক তেজেৰে ৰাঙলী হোৱাৰ পৰা ৰক্ষা পাবলৈহে তেওঁক আফগানিস্তানৰ পৰা বাহিৰলৈ লৈ যোৱা হৈছিল । ঘানিয়ে বুধবাৰে বিয়লি তেওঁৰ ফেচবুক পেজত এটা ভিডিঅ' পোষ্ট কৰি নিশ্চিত কৰিছিল যে তেওঁ আৰৱত আছে । তেওঁ এই বাৰ্তাৰ জৰিয়তে আফগান নিৰাপত্তা বাহিনীক ধন্যবাদ জ্ঞাপন কৰে ।
আৰৱৰ বৈদেশিক পৰিক্ৰমা আৰু আন্তঃৰাষ্ট্ৰীয় সহযোগিতা মন্ত্ৰণালয়ে এক বিবৃতিযোগে জনাইছে যে, আফগান ৰাষ্ট্ৰপতি আশ্ৰফ ঘানি আৰু তেওঁৰ পৰিয়ালক মানৱীয়তাৰ খাতিৰত আৰৱে আদৰণি জনাইছে । আনহাতে ঘানিয়ে এই ভিডিঅ' বাৰ্তাৰ জৰিয়তে তাজিকিস্তানত থকা আফগানিস্তানৰ ৰাষ্ট্ৰদূতৰ এক অভিযোগো অস্বীকাৰ কৰে । ঘানিয়ে পলায়নৰ সময়ত আফগানিস্তানৰ ৰাজকোষৰ পৰা ১৬৯ নিযুত আমেৰিকান ডলাৰ চুৰি কৰিছিল বুলি ৰাষ্টদূতগৰাকীয়ে অভিযোগ তুলিছিল ।
ঘানিয়ে কৈছে যে, তেওঁৰ লগত সেই সময়ত কেৱল তেওঁ পৰিধান কৰি থকা পৰম্পৰাগত এযোৰ সাজ আৰু এযোৰ চেণ্ডেল আছিল । ৰাষ্টদূতগৰাকীৰ অভিযোগ সম্পূৰ্ণ ভিত্তিহীন বুলি মন্তব্য কৰে ঘানিয়ে । কাবুলত থকা ৰাছিয়াৰ ৰাষ্ট্ৰদূতেও অভিযোগ উত্থাপন কৰিছিল যে, ঘানিয়ে চাৰিখন গাড়ী আৰু নগদ ধনেৰে ভৰ্তি এখন হেলিকপ্টাৰ লৈ কাবুল ত্য়াগ কৰিছিল । তেওঁ অভিযোগ তুলিছিল যে, চাৰিওখন বাহন নগদ ধনেৰে ভৰি আছিল আৰু হেলিকপ্টাৰতো ধন লৈ যোৱা হৈছিল । আনকি লগত নিয়াৰ অসুবিধাৰ বাবে বহু পৰিমাণৰ ধন ৰাণৱেত পেলাই থৈ গৈছিল আশ্ৰফ ঘানিয়ে । কিন্তু ভিডিঅ'টোত ঘানিয়ে সকলো অভিযোগ নস্যাৎ কৰিছে ।
লগতে পঢ়ক:তালিবানৰ বিৰুদ্ধে হাতত অস্ত্ৰ তুলি লোৱা ছালিমা মাজাৰী আফগানিস্তানত বন্দী
