ইন্টাৰনেশ্যনেল ডেস্ক, 1 ডিচেম্বৰ : সমাজৰ উন্নয়নমূলক কাৰ্যত প্ৰতিবন্ধী ব্যক্তিৰ অন্তৰ্ভুক্তিকৰণ বহু প্ৰয়োজনীয় বুলি মন্তব্য কৰে ৰাষ্ট্ৰসংঘৰ সাধাৰণ সচিব অন্টনিঅ' গুটেৰেছে ৷
প্ৰতিবন্ধী ব্যক্তিৰ অধিকাৰ সন্মিলন,2006ৰ অংশীদাৰ দেশসমূহৰ সৈতে আলোচনাচক্ৰত এই মন্তব্য কৰে ৰাষ্ট্ৰসংঘৰ সাধাৰণ সচিবগৰাকীয়ে ৷ এই ব্যক্তিসকলে সঘনে সন্মুখীন হোৱা অক্ষমতাসমূহ জয় কৰাৰ লগতে অন্যায় আৰু ভেদভাৱৰ পৰা তেওঁলোকক আঁতৰাই ৰখাৰ ওপৰত বিশেষ গুৰুত্ব আৰোপ কৰে গুটেৰেছে ৷
তেওঁ কয়, "প্ৰতিবন্ধী লোকসকলৰ অধিকাৰ সম্পৰ্কত উপলব্ধি কৰাৰ জৰিয়তে 2030 Agenda ৰ মূল প্ৰতিশ্ৰুতিসমূহ পূৰ কৰিব পৰা যাব : ইয়াৰ জৰিয়তে কোনো লোক পিছপৰি থাকিব নালাগে ৷"
তেওঁ লগতে কয়,"সকলো ক্ষেত্ৰতে আমাৰ লক্ষ্য স্পষ্ট,এখন পৃথিৱী য'ত সকলোৱে সমান সুবিধা,সিদ্ধান্ত গ্ৰহণত অংশগ্ৰহণ আৰু অৰ্থনৈতিক,সামাজিক, ৰাজনৈতিক আৰু সাংস্কৃতিক জীৱনত অৰিহণা যুগুৱাত গুৰুত্বপূৰ্ণ ভূমিকা গ্ৰহণ কৰিব পাৰে ৷"
উল্লেখ্য যে, 3 ডিচেম্বৰত অনুষ্ঠিত হ'বলগা আন্তৰাষ্ট্ৰীয় প্ৰতিবন্ধী দিৱসৰ পূৰ্বে অনুষ্ঠিত কৰা হয় 13 সংখ্যক প্ৰতিবন্ধী ব্যক্তিৰ অধিকাৰ সন্মিলন ৷
লগতে পঢ়ক : গুৰু নানকৰ 551 সংখ্যক জন্ম জয়ন্তীত বাইডেন,হেৰিছৰ শুভেচ্ছা বাণী
