বিলাসীপাৰা, ৬ জুনঃ কৰোনা মহামাৰীয়ে সমগ্ৰ দেশ তথা ৰাজ্যৰ লগতে ধুবুৰী জিলাৰ বিলাসীপাৰা মহকুমাতো ভয়ঙ্কৰ ৰূপ ধাৰণ কৰিছে । কোভিড-১৯ ত আক্ৰান্তৰ সংখ্যা প্ৰায় প্ৰত্যেক দিনেই বৃদ্ধি হৈছে বিলাসীপাৰাত । কুৱাৰেন্টাইন হৈ আছে শ শ লোক । এনে সময়তে শনিবাৰে বিলাসীপাৰাৰ শালকোচা উচ্চতৰ মাধ্যমিক বিদ্যালয় কুৱাৰেন্টাইন কেন্দ্ৰত অত্যাৱশ্যকীয় সামগ্ৰী বিতৰণ কৰে ধুবুৰীৰ সাংসদ মৌলানা বদৰউদ্দিন আজমল তথা আজমল ফাউণ্ডেছনে ।
আজমল ফাউণ্ডেছনে কেন্দ্ৰটোত কুৱাৰেন্টাইন হৈ থকা প্ৰায় ১৬০ জন দৰিদ্ৰ লোকৰ মাজত আঠুৱা, খোৱা বস্তু আদিকে ধৰি বিভিন্ন অত্যাৱশ্যকীয় সামগ্ৰী বিতৰণ কৰে । এই অত্যাৱশ্যকীয় সামগ্ৰী বিতৰণৰ সময়ত কেন্দ্ৰটোত উপস্থিত থাকে চাপৰ জিলা জমিয়তৰ সভাপতি, সম্পাদকৰ লগতে বিলাসীপাৰাৰ যুৱ সমাজ কৰ্মী ফজৰ আলী মণ্ড আৰু আবু হানিফা । মৌলানা বদৰউদ্দিন আজমল আৰু আজমল ফাউণ্ডেশনৰ এই পদক্ষেপক কৃতজ্ঞতা জনাইছে কুৱাৰেন্টানত থকা ব্যক্তিসকলৰ লগতে বিলাসীপাৰাৰ সচেতন মহলে ।
