চিটাৰা ডেস্ক, 14 নৱেম্বৰ: টিভিত নহয় নেটফ্লিক্সত এইবাৰ আলোড়নৰ সৃষ্টি কৰিব কমেডিয়ান কপিল শৰ্মাই । অ’টিটি প্লেটফৰ্মৰ পৰা নতুনকৈ আৰম্ভণি কৰিব কপিল শৰ্মা শ্ব’ । ছ’চিয়েল মিডিয়াত কপিলে তেওঁৰ শ্ব’টোৰ কথা ঘোষণা কৰিছে । দৰাচলতে শ্ব’টোৰ প্লেটফৰ্ম সলনি হৈছে যদিও কপিলে নিজৰ পুৰণি দলটোৰ সৈতে আকৌ এবাৰ সকলোকে হাঁহিৰ খোৰাক দিবলৈ সাজু হৈছে । কপিলে এটা ভিডিঅ’ শ্বেয়াৰ কৰি নতুন শ্ব’টোত কোন কোন থাকিব সেই কথা ঘোষণা কৰিছে ।
কপিল শৰ্মাৰ কমেডী শ্ব’ত তেওঁৰ সৈতে অৰ্চনা পুৰণ সিং, ৰাজীৱ ঠাকুৰ, কিকু শাৰদা আৰু কৃষ্ণা অভিষেককো দেখা যাব । ভিডিঅ’টো শ্বেয়াৰ কৰি নেটফ্লিক্সে লিখিছে- জানেনে, কপিলৰ নতুন ঠিকনা ? মোৰ পৰিয়ালৰ গ্ৰুপত ভাল খবৰটো শ্বেয়াৰ কৰিছো কাৰণ কপিল এণ্ড দ্য গেং অতি সোনকালে নেটফ্লিক্সলৈ আহি আছে !
ঘৰ সলনি হৈছে, পৰিয়াল নহয় - কপিল শৰ্মা
ভিডিঅ’টোত দেখা গৈছে কপিল শৰ্মা নতুন ঘৰলৈ স্থানান্তৰিত হৈছে । তেওঁ সহায়িকাক কয় যে তেওঁ ঘৰত কোনো পুৰণি বস্তু নিবিচাৰে । ইয়াৰ পিচত ক্ৰমান্বয়ে অৰ্চনা পুৰণ সিং, ৰাজীৱ ঠাকুৰ, কিকু শাৰদা আৰু কৃষ্ণা অভিষেক ঘৰৰ এটা এটা কোণৰ পৰা ওলোৱা দেখা যায় । ইয়াৰ পিচত কপিলে ঘৰৰ পৰা ওলাই যাবলৈ আৰম্ভ ধৰে, পিচত সহায়িকাগৰাকীয়ে সুধিলে মই সকলোকে বাহিৰলৈ পঠিয়াই দিম নেকি ? ইয়াৰ উত্তৰত কপিলে হাঁহি হাঁহি কয় – ঘৰখন হে সলনি হৈছে, পৰিয়াল সলনি হোৱা নাই ।
উল্লেখ্য যে, কপিল শৰ্মাই দীৰ্ঘদিন ধৰি টিভি চেনেলত কমেডী শ্ব’ জৰিয়তে ঘৰে ঘৰে সকলোকে হাঁহিৰ খোৰাক দি আহিছে । ২০১৬ চনত তেওঁ প্ৰথমবাৰৰ বাবে চ’নীত নিজৰ অনুষ্ঠানটো আৰম্ভ কৰিছিল । ছলমান খান, শ্বাহৰুখ খান, অক্ষয় কুমাৰকে ধৰি বহু চেলিব্ৰিটিয়ে নিজৰ ছবিৰ প্ৰচাৰৰ বাবে আহে কপিল শৰ্মা শ্ব’লৈ ৷
