চিটাৰা ডেস্ক, ২১ ছেপ্টেম্বৰ: বলীউডৰ কিং শ্বাহৰুখ খানৰ ছবি ‘জৱান’ মুক্তিৰ পিচতে গোটেই বিশ্বজুৰি আলোড়নৰ সৃষ্টি কৰিছে ৷ ছবিখনে মাত্ৰ ১৪ দিনৰ ভিতৰতে অতিক্ৰম কৰিলে ৯০০ কোটি টকা । এতিয়াও এই ছবিখনৰ উন্মাদনা শেষ হোৱা নাই । যদি আপুনি এতিয়াও জৱান ছবিখন চোৱা নাই, তেন্তে আপোনাৰ বাবে লৈ আহিছো এক সুখবৰ ৷ আচলতে ১৩ অক্টোবৰত ৰাষ্ট্ৰীয় চিনেমা দিৱস পালন কৰা হ’ব । ৰাষ্ট্ৰীয় চিনেমা দিৱসত টিকটৰ দাম বহুত কম কৰা হয়, যাতে অধিক সংখ্যক লোকে চিনেমা হলত চিনেমা চাব পাৰে আৰু চিনেমা হলৰ অভিজ্ঞতা ল’ব পাৰে ।
যিহেতু সাধাৰণতে ছবি এখনৰ টিকটৰ মূল্য বহুত বেছি থাকে, সেয়েহে, একাংশই কেতিয়াবা মন থাকিলেও ছবিগৃহত গৈ ছবি উপভোগ কৰিব নোৱাৰে ৷ যাৰ বাবে অনলাইনত অথবা টিভিত ছবিখন অহালৈ অপেক্ষা কৰে ৷ কিন্তু এতিয়া ১৩ অক্টোবৰত ৰাষ্ট্ৰীয় চিনেমা দিৱস উপলক্ষে টিকট বিক্ৰী হ’ব মাত্ৰ ৯৯ টকাত ৷ গতিকে আপুনিও ছবিখন ছবিগৃহত উপভোগ কৰাৰ সুযোগ পাব ৷ এই সিদ্ধান্তই কেৱল দৰ্শককে উপকৃত নকৰে, ইয়াৰ পৰা ‘জৱান’ ছবিখনেও বাম্পাৰ বেনিফিট পাব পাৰে ।
যোৱাবাৰো ৰাষ্ট্ৰীয় চিনেমা দিৱসত টিকটৰ মূল্য হ্ৰাস কৰা হৈছিল ৷ সেয়েহে, যোৱাবাৰো সস্তীয়া টিকটৰ কৌশল নিৰ্মাতাসকলৰ বাবে উপকাৰী বুলি প্ৰমাণিত হৈছিল । ‘ব্ৰহ্মাস্ত্ৰ’ৰ সময়তো টিকটৰ দাম কমিছিল । সেই সময়ছোৱাত ৰাষ্ট্ৰীয় চিনেমা দিৱস উপলক্ষে ব্ৰহ্মাষ্ট্ৰৰ উপাৰ্জনত ২৩৯% লাভ হয় । সেইদিনা আলিয়া ভাট আৰু ৰণবীৰ কাপুৰৰ ছবিখনে ১০.৮০ কোটি টকা সংগ্ৰহ কৰিছিল ।
৭৫ টকাত বিক্ৰী হৈছিল চিনেমাৰ টিকট
ব্ৰহ্মাষ্ট্ৰৰ সময়ত বহু ঠাইত ৭৫ টকা পৰ্যন্ত মূল্যৰ টিকট বিক্ৰী হৈছিল । এইবাৰ ৰাষ্ট্ৰীয় চিনেমা দিৱসত চিনেমাৰ টিকটৰ মূল্য ৯৯ টকা । সমগ্ৰ দেশৰ ছবিগৃহৰ বাবে এই সিদ্ধান্ত গ্ৰহণ কৰিছে মাল্টিপ্লেক্স এছ’চিয়েশ্যন অৱ ইণ্ডিয়াই । এই সিদ্ধান্তৰ উদ্দেশ্য হৈছে অধিক সংখ্যক লোকক চিনেমা হলত চিনেমা চাবলৈ অনুপ্ৰাণিত কৰা ।
