চিটাৰা ডেস্ক, 6 আগষ্ট: শেহতীয়াকৈ সংবাদ মাধ্যম তথা ছ’চিয়েল মিডিয়াৰ শিৰোনাম দখল কৰি আহিছে অভিনেত্ৰী ইলিয়ানা ডি ক্ৰুজে ৷ অৱশ্যে অভিনয়ৰ বাবে নহয় অন্য এটা কাৰণতহে চৰ্চাত আছিল অভিনেত্ৰীগৰাকী ৷ হয়, বিগত কেইমাহ মান পূৰ্বে অভিনেত্ৰীগৰাকীয়ে ছ’চিয়েল মিডিয়াত প্ৰকাশ কৰিছিল নিজৰ অন্তঃসত্বা হোৱাৰ খবৰ ৷ অৱশ্যে অভিনেত্ৰীগৰাকীৰ অন্তঃসত্বা হোৱাৰ খবৰ এই কাৰণেই চৰ্চিত হৈছিল যে, অভিনেত্ৰীগৰাকী বিবাহিত নাছিল ৷ অন্তঃসত্বা হোৱাৰ খবৰ অনুৰাগীৰ সৈতে অভিনেত্ৰীগৰাকীয়ে শ্বেয়াৰ কৰাৰ পিচত অভিনেত্ৰীগৰাকীয়ে প্ৰায়ে ছ’চিয়েল মিডিয়াত বেবী বাম্প দেখুৱাই শ্বেয়াৰ কৰিছিল ফটো ৷
এতিয়া অভিনেত্ৰীগৰাকীৰ সৈতে জড়িত এটা ভাল খবৰ পোৱা গৈছে ৷ এটি পুত্ৰ সন্তানৰ মাতৃ হ’ল ইলিয়ানা ডি ক্ৰুজ । অভিনেত্ৰীগৰাকীয়ে নিজেই এই ভাল খবৰটো নিজৰ সকলো অনুৰাগীৰ সৈতে শ্বেয়াৰ কৰিছে । ইলিয়ানাই নৱজাতকটিৰ এটি ফটোও শ্বেয়াৰ কৰিছে ৷ লগতে পুত্ৰৰ নামো শ্বেয়াৰ কৰিছে ইলিয়ানাই ৷ ।
পুত্ৰৰ ফটো আৰু নাম শ্বেয়াৰ কৰিলে ইলিয়ানা ডি ক্ৰুজে
ইলিয়ানাই নিজৰ পুত্ৰৰ এখন ব্লেক এণ্ড ৱাইট ফটো শ্বেয়াৰ কৰিছে । ইয়াৰ সমান্তৰালকৈ শিশুটিৰ জন্মৰ তাৰিখ আৰু নামো শ্বেয়াৰ কৰিছে ৷ ইলিয়ানাই পুত্ৰৰ নাম ৰাখিছে কোয়া ফিনিক্স ডোলান (Koa Phoenix Dolan) ৷ ২০২৩ চনৰ ১ আগষ্টত পুত্ৰ সন্তানটি জন্ম দিয়ে ইলিয়ানাই ।
এই ফটোখনৰ সৈতে কেপচনত ইলিয়ানাই লিখিছে, ‘‘আমি আমাৰ পুত্ৰক এই পৃথিৱীলৈ আদৰি লৈ কিমান সুখী হৈছো সেয়া আমি শব্দৰে প্ৰকাশ কৰিব নোৱাৰো ।’’
ইলিয়ানালৈ অভিনন্দন জ্ঞাপন অনুৰাগীৰ-
ইলিয়ানাই মাতৃ হোৱাৰ লগতে জীৱনৰ নতুন পৰ্যায়ত উপনীত হোৱাৰ বাবে অনুৰাগী আৰু চেলিব্ৰিটিৰ পৰা শুভেচ্ছা লাভ কৰিবলৈ আৰম্ভ কৰিছে। তেওঁৰ এই পোষ্টটোৰ ওপৰত মন্তব্য ক্ৰমাগতভাৱে বাঢ়ি গৈছে । কেইমিনিটমানৰ ভিতৰতে হাজাৰ হাজাৰ লোকে ইলিয়ানাক অভিনন্দন জনাইছে ।
এপ্ৰিল মাহত ইলিয়ানাই গৰ্ভাৱস্থাৰ বিষয়ে তথ্য শ্বেয়াৰ কৰিছিল
এপ্ৰিল মাহত ইলিয়ানাই গৰ্ভধাৰণৰ কথা ঘোষণা কৰিছিল । তেতিয়াৰ পৰাই অভিনেত্ৰীগৰাকীয়ে ছ’চিয়েল মিডিয়াত এটা চৰ্চাৰ বিষয় হৈ পৰিছিল ৷ দীৰ্ঘদিন ধৰি অভিনেত্ৰীগৰাকীয়ে পুত্ৰৰ পিতৃৰ নামত চাচপেন্স ৰাখিছিল । অৱশ্যে পিচত ইলিয়ানাই পুত্ৰৰ পিতৃৰ নাম প্ৰকাশ কৰে । অৱশ্যে ইলিয়ানাৰ এংগেজমেণ্ট কিম্বা বিবাহ এতিয়ালৈকে সম্পন্ন হোৱা নাই ৷ এনে পৰিস্থিতিত ইলিয়ানাই বিয়া নোহোৱাকৈ অন্তঃসত্বা হোৱাৰ বাবে ট্ৰলিঙৰ সন্মুখীন হ’বলগীয়া হৈছিল ৷ যদিও এই নেতিবাচকতাৰ পৰা আঁতৰি নিজৰ বেবী বাম্প প্ৰদৰ্শন কৰি অভিনেত্ৰীগৰাকীয়ে ছবি শ্বেয়াৰ কৰিছিল ৷
