চিটাৰা ডেস্ক, 8 নৱেম্বৰ: চূড়ান্ত হৈছে ৰেপাৰ হানি সিং আৰু তেওঁৰ পত্নী শালিনী তালৱাৰৰ বিবাহ বিচ্ছেদ । মঙলবাৰে দিল্লীৰ আদালতে হানি সিং আৰু তেওঁৰ পত্নী শালিনীৰ বিবাহ বিচ্ছেদত অনুমতি দিয়ে । যোৱা বছৰ শালিনীয়ে হানি সিঙৰ বিৰুদ্ধে ঘৰুৱা হিংসাৰ অভিযোগ উত্থাপন কৰিছিল । অৱশেষত ২০ বছৰীয়া বিবাহৰ অন্ত পৰে হানি সিং আৰু শালিনীৰ ৷
শালিনীৰ পৰা বিবাহ বিচ্ছেদ ল’বলৈ হানি সিঙে দিবলগীয়া হ’ল বৃহৎ পৰিমাণৰ ধন
সংবাদ মাধ্যমৰ খবৰ অনুসৰি ক্ষতিপূৰণৰ বাবে হানি সিঙৰ পৰা ১০ কোটি টকা দাবী কৰিছিল শালিনীয়ে । কিন্তু এতিয়া দুয়োৰে মাজত এক কোটি টকাৰ ক্ষতিপূৰণৰ চুক্তি হৈছে । উল্লেখ্য যে, শালিনীয়ে হানি সিঙৰ বিৰুদ্ধে বহু গুৰুতৰ অভিযোগ উত্থাপন কৰিছিল । তেওঁ নিজৰ বিবৃতিত কৈছিল যে হানি সিঙে তেওঁক প্ৰতাৰণা কৰিছিল । ৰেপাৰগৰাকীয়ে আন মহিলাৰ সৈতেও শাৰীৰিক সম্পৰ্ক স্থাপন কৰিছিল । কেৱল এয়াই নহয়, ৰেপাৰগৰাকীয়ে তেওঁক মানসিক আৰু শাৰীৰিকভাৱে শোষণ কৰা বুলিও দাবী কৰিছিল শালিনীয়ে ।
এই অভিযোগৰ সন্দৰ্ভত হানি সিঙৰ প্ৰতিক্ৰিয়া
এই অভিযোগৰ সন্দৰ্ভত হানি সিঙে কৈছিল যে, ‘‘বহু সময়ত মোৰ গীতবোৰক ঠাট্টা কৰা হৈছিল । মোৰ স্বাস্থ্য সম্পৰ্কীয় নেতিবাচক খবৰৰ সন্দৰ্ভতো মই কেতিয়াও কোনো বক্তব্য দিয়া নাছিলো । কিন্তু এনে অভিযোগত মৌনতা অৱলম্বন কৰাটো মই সঠিক বুলি নাভাবিলোঁ । মোৰ বিৰুদ্ধে এনে গুৰুতৰ অভিযোগত মই গভীৰভাৱে দুখী হৈছো ।’’ ইফালে কিছুদিনৰ পৰা হানী সিঙৰ নাম মডেল টিনা থাদানীৰ সৈতে জড়িত হৈ পৰিছে । কোৱা হৈছে হানিয়ে টিনাক ডেট কৰি আছে ৷ অৱশ্যে এই সন্দৰ্ভত হানিয়ে কোনো আনুষ্ঠানিক বক্তব্য প্ৰদান কৰা নাই ৷
