চিটাৰা ডেস্ক, 28 এপ্ৰিল: ২০১৩ চনৰ ৩ জুনত মুম্বাইৰ নিজা বাহগৃহৰ পৰা উদ্ধাৰ হৈছিল বলীউডৰ অভিনেত্ৰী জিয়া খানৰ মৃতদেহ । অভিনেত্ৰীগৰাকীৰ আত্মহত্যাৰ গোচৰত প্ৰায় ১০ বছৰৰ মূৰত আজি বিশেষ চিবিআই আদালতে ৰায় দিয়ে । এই গোচৰত অভিনেতা সূৰজ পাঞ্চোলিয়ে জিয়াক আত্মহত্যা কৰাত সহযোগ কৰাৰ অভিযোগ উত্থাপন হৈছিল । অৱশেষত দহ বছৰ ধৰি চলি থকা জিয়া খানৰ মৃত্যুৰ গোচৰত অভিযুক্ত সূৰজ পাঞ্চোলিক দোষমুক্ত ঘোষণা কৰে আদালতে (Jiah Khan suicide case) ৷
বিগত সপ্তাহত বিশেষ কেন্দ্ৰীয় তদন্তকাৰী ব্যুৰোৰ আদালতৰ ন্যায়াধীশ এ এছ ছায়াদে দুয়োপক্ষৰ চূড়ান্ত যুক্তি শুনানি গ্ৰহণ কৰি গোচৰটোত নিজৰ ৰায় সংৰক্ষিত কৰি ৰাখিছিল । 2013 চনৰ 3 জুনত জুহুৰ বাসগৃহত মৃত অৱস্থাত উদ্ধাৰ হৈছিল আমেৰিকান নাগৰিক জিয়া (২৫)ৰ মৃতদেহ । পিচত আৰক্ষীয়ে ছয় পৃষ্ঠাৰ চিঠিৰ ভিত্তিত সূৰজক গ্ৰেপ্তাৰ কৰিছিল, যিখন চিঠি অভিনেত্ৰী জিয়া খানে লিখা বুলি কোৱা হৈছে ৷ চিঠি অনুসৰি জিয়াক আত্মহত্যাত উচটনি দিয়াৰ অভিযোগত গোচৰ ৰুজু কৰে ভাৰতীয় দণ্ডবিধিৰ (আই পি চি) ধাৰা ৩০৬ৰ অধীনত (Jiah Khan suicide verdict) ।
প্ৰথমে গোচৰৰ তদন্ত কৰা মুম্বাই আৰক্ষীয়ে জব্দ কৰা চিঠিখন জিয়া খানে লিখা বুলি চিবিআইয়ে অভিযোগ কৰিছিল । কেন্দ্ৰীয় সংস্থাটোৱে জনোৱা মতে, টোকাটোত জিয়া খানৰ “অন্তৰংগ সম্পৰ্ক, শাৰীৰিক নিৰ্যাতন আৰু মানসিক আৰু শাৰীৰিক নিৰ্যাতন”ৰ বৰ্ণনা কৰিছিল ৷ য’ত উল্লেখ আছিল সূৰজৰ নাম ৷
কেন্দ্ৰীয় সংস্থাই তদন্ত কৰা বাবে গোচৰটোৰ ওপৰত নিজৰ অধিকাৰ নাই বুলি অধিবেশন আদালতে কোৱাৰ পিচতে ২০২১ চনত চিবিআইৰ বিশেষ আদালতত গোচৰটো পুনৰ অৰ্পণ কৰা হয় । এই গোচৰৰ মূল বিচাৰ সাক্ষী জিয়াৰ মাতৃ ৰাবিয়া খানে আদালতত কয় যে তেওঁ বিশ্বাস কৰিছিল যে এইটো আত্মহত্যাৰ গোচৰ নহয় । যোৱা বছৰ বম্বে উচ্চ ন্যায়ালয়ে এই গোচৰৰ নতুন তদন্ত বিচাৰি তেওঁৰ আবেদন খাৰিজ কৰিছিল ।
জিয়াৰ মাতৃ ৰাবিয়াই চিবিআই আদালতত কৈছিল যে সূৰজে জিয়াক শাৰীৰিক আৰু মৌখিক গালি-গালাজ পাৰিছিল । ৰাবিয়াই আদালতত এই কথাও কয় যে তেওঁৰ কন্যাই আত্মহত্যা কৰা বুলি প্ৰমাণ কৰিবলৈ আৰক্ষী বা চিবিআইয়ে কোনো “আইনী প্ৰমাণ” সংগ্ৰহ কৰা নাই ।
জিয়াই বহু ছবিত ডাঙৰ তাৰকাৰ সৈতে কাম কৰিছিল
২০০৭ চনত অমিতাভ বচ্চনৰ বিপৰীতে ‘নিশব্দ’ ছবিৰে চলচ্চিত্ৰ জগতত কেৰিয়াৰ আৰম্ভ কৰিছিল জিয়াই । বলীউডত আত্মপ্ৰকাশ কৰাৰ সময়ত জিয়াৰ বয়স আছিল মাত্ৰ ২১ বছৰ । জিয়া আৰু অমিতাভৰ মাজত এক ৰোমান্টিক সম্পৰ্ক এই ছবিখনত দেখুৱাইছে ৰাম গোপাল বৰ্মাই । জিয়াৰ অভিনয়ক অতিশয় প্ৰশংসা কৰা হৈছিল ।
ইয়াৰ পিচত জিয়া খানে ২০০৮ চনৰ ব্লকবাষ্টাৰ ছবি ‘গজিনী’ত আমিৰ খানৰ সৈতে অভিনয় কৰিছিল। আমিৰ খান আৰু আছিন অভিনীত এই ছবিখনত মেডিকেলৰ ছাত্ৰৰ চৰিত্ৰত অভিনয় কৰিছিল জিয়া । ইয়াৰ পিচত ২০১০ চনত জিয়াই তৃতীয় আৰু শেষৰখন ছবি ‘হাউছফুল’ কৰিছিল । এই ছবিখনতো জিয়াই অক্ষয় কুমাৰৰ দৰে ডাঙৰ তাৰকাৰ সৈতে পৰ্দা শ্বেয়াৰ কৰিছিল আৰু এই ছবিখনো হিট হৈছিল।
লগতে পঢ়ক: Jiah Khan case verdict today: চিবিআই আদালতলৈ ৰাওনা হ’ল সূৰজ পাঞ্চোলি; চাওক ভিডিঅ’
