নিউজ ডেস্ক, 25 এপ্ৰিল : বলীউডৰ গীতে দশক দশক ধৰি মানুহক মনোৰঞ্জন দি আহিছে । যিকোনো অনুষ্ঠানতেই মানুহে বলীউডৰ গীতেৰ সৈতে উপভোগ কৰে । কাৰোবাৰ জন্মদিন হওক, পাৰ্টি হওক বা কাৰোবাৰ বিয়া অভ্যৰ্থনাই হওক, বলীউড সংগীত এক উতঃপ্ৰোতঃ অংশ হৈ পৰে । সংগীতে প্ৰতিটো অনুষ্ঠানতে এক উৎসাহ যোগ দিয়ে । সুখতো সংগীত দুখতো সংগীতে মানুহক এক অন্যন্য মাদকতা দিয়ে । মুঠতে ক'বলৈ গ'লে সংগীত বিশেষকৈ বলীউডৰ সংগীত আমাৰ জীৱনত এক বিশেষ স্থান ল'বলৈ সক্ষম হৈছে ৷
বহু গায়কে বলীউডৰ বাবে এটাৰ পিচত আনটো উৎকৃষ্ট গীত গাইছে যদিও এই মুহুৰ্তত আটাইতকৈ বেছি বাতৰিৰ শিৰোনাম দখল কৰাজনেই হৈছে অৰিজিৎ সিং । অৰিজিৎ সিঙৰ কণ্ঠত সেই যাদু আছে যি যাদুৱে যিকোনো গীতত এক বিশেষ এক মিঠা অনুভূতি দিব পাৰে ৷ ৰাস্তাত খোজ কাঢ়ি যোৱাৰ সময়ত তেওঁৰ কণ্ঠত গোৱা গানবোৰ মানুহে শুনিলে কিছু ক্ষণ হ'লেও স্তব্ধ হৈ পৰে । সুখতে হওক বা দুখতে হওক মানুহে অৰিজিতৰ গীত শুনি ভাল পায় ৷ তেওঁ গোৱা গীতবোৰ মুক্তি পোৱাৰ লগে লগে চাৰ্টবাষ্টাৰৰ তালিকাত অন্তৰ্ভুক্ত হয় ।
‘Kesariya’, ‘Channa Mereya’, ‘Ae Dil Hain Mushkil, ‘Tum Hi Ho’ ৰ দৰে বহু জনপ্ৰিয় গীতত কণ্ঠদান কৰা অৰিজিৎ সিঙে জন্মদিন ৷ আজি তেওঁ ৩৬ বছৰ বয়সত ভৰি দিয়ে । ১৯৮৭ চনৰ ২৫ এপ্ৰিলত পশ্চিমবংগৰ মুৰ্ছিদাবাদৰ জিয়াগাঞ্জত জন্মগ্ৰহণ কৰিছিল অৰিজিতে । অৰিজিৎ এটি পাঞ্জাবী শিখ পৰিয়ালয়ত জন্মগ্ৰহণ কৰিছিল ।
অতি কম বয়সৰ পৰাই তেওঁ সংগীতৰ প্ৰশিক্ষণ আৰম্ভ কৰিছিল । সৰুৰে পৰা অৰিজিৎ গান গোৱাৰ প্ৰতি আকৰ্ষিত হৈছিল । অৰিজিতৰ মামী ভাৰতীয় শাস্ত্ৰীয় সংগীতত বিশেষজ্ঞ আছিল আৰু তেওঁৰ আইতাকে গীত গোৱাৰ প্ৰতি আগ্ৰহী আছিল ৷ সেয়ে পৰিয়ালটোত সংগীতৰ এক পৰিৱেশ থকাৰ বাবে অৰিজিতৰ সংগীতৰ প্ৰতি আগ্ৰহ আৰু বাঢ়ি গৈছিল ।
অৰিজিতে বহু শিল্পীৰ পৰা শিক্ষাগ্ৰহণ
অৰিজিতে ৰাজা বিজয় সিং হাইস্কুলৰ পৰা স্কুলীয়া শিক্ষা গ্ৰহণ কৰি শ্ৰীপত সিং কলেজৰ পৰা ডিগ্ৰী লাভ কৰে । তেওঁ শাস্ত্ৰীয় সংগীতৰো শিক্ষাগ্ৰহণ কৰে । অৰিজিতে বিথোভেন আৰু বাংলা শাস্ত্ৰীয় সংগীত অধিক শুনিছিল । গুলাম আলী খান, উস্তাদ ৰাছি খান, জাকিৰ হুছেইন আদি জ্যেষ্ঠ সংগীত শিল্পীৰ শ্ৰেষ্ঠ সংগীত শুনিয়েই নিজৰ সংগীতৰ এই যাত্ৰা আৰম্ভ কৰিছিল ।
গুৰুকুল শ্ব’ত পৰাজিত হৈছিল অৰিজিৎ
গুৰুকুল (২০০৫) ছবিখনত তেওঁৰ গুৰু ৰাজেন্দ্ৰ প্ৰসাদ হাজাৰীয়ে অংশগ্ৰহণ কৰিবলৈ কোৱাৰ পৰাই অৰিজিতে সংগীত জীৱন আৰম্ভ কৰিছিল । সেই সময়ছোৱাত অৰিজিতৰ বয়স আছিল মাত্ৰ ১৮ বছৰ । যদিও দৰ্শকৰ ভোটগ্ৰহণত অৰিজিৎ শ্ব’ৰ পৰা বাহিৰ হৈ গৈছিল । শ্ব’টোত অৰিজিতে ষষ্ঠ স্থান দখল কৰে । এই অনুষ্ঠানৰ সময়তে সঞ্জয় লীলা ভাঞ্চালীয়ে অৰিজিতৰ প্ৰতিভা অনুভৱ কৰি তেওঁৰ ছবিৰ এটি গীতত কন্ঠদান কৰিবলৈ সুযোগ প্ৰদান কৰিছিল ৷ কিন্তু কোনো কাৰণত ছবিখনৰ চিত্ৰনাট্য সলনি কৰাৰ বাবে কেতিয়াও গীতটো মুক্তি পোৱা নাছিল ।
শ্ব' ১০ কে ১০ লে গয়ে দিলত জয়লাভ
গুৰুকুল এৰি যোৱাৰ পিচত টিপছৰ মুৰব্বী কুমাৰ তৌৰাণীয়ে অৰিজিতক তেওঁৰ এটি এলবামৰ বাবে চুক্তিবদ্ধ কৰে । এই এলবামটো অৱশ্যে কেতিয়াও মুক্তি পোৱা নাছিল । ইয়াৰ পিচত অৰিজিতে আন এটা শ্ব’ ১০ কে ১০ লে গয়ে দিলত অংশগ্ৰহণ কৰে । এই শ্ব’ত অৰিজিতে জয়ী হৈছিল । ইয়াৰ পিছতে তেওঁ মুম্বাইলৈ যোৱাৰ সিদ্ধান্ত গ্ৰহণ কৰে । সেই সময়ত অৰিজিতে লোখাণ্ডৱালাত বসবাস কৰিছিল । ১০ কে ১০ লে গয়ে দিল শ্ব’ত লাভ কৰা দহ লাখ টকাৰ পুৰস্কাৰৰ ধনেৰে অৰিজিতে নিজাকৈ ৰেকৰ্ডিং ষ্টুডিঅ’ নিৰ্মাণ কৰে, য’ৰ পৰা সংগীত প্ৰযোজক আৰু সুৰকাৰ হিচাপে প্ৰস্তুতি আৰম্ভ কৰে । অৰিজিতে সুপৰিচিত সংগীতকাৰ প্ৰীতমৰ সৈতে কাম কৰিবলৈ আৰম্ভ কৰে ।
বহু ছবিত গোৱা গীত
প্ৰীতমৰ সৈতে তেওঁ Golmaal, Crook আদি ছবিত কাম কৰিছিল । এই সময়ছোৱাত তেওঁ তেলেগু চলচ্চিত্ৰ জগতৰ বাবেও নিজৰ কণ্ঠ নিগৰাইছিল । ২০১১ চনত অৰিজিত সিঙে Murder 2 ছবিৰ জৰিয়তে বলীউডত নিজৰ সংগীতৰ জীৱন আৰম্ভ কৰে । এই ছবিখনৰ বাবে তেওঁ Phir Mohabbat গীতটিত কণ্ঠদান কৰিছিল ।
ইয়াৰ পিচত তেওঁ বহু বলীউড ছবিৰ গীতত কণ্ঠদান কৰিছিল । য’ত Raabata, Uska hi Banana, Nashe Si Chadh Gayi, Tum hi ho, Kabira, Ilahi ইত্যাদিৰ দৰে শ্ৰেষ্ঠ গীতত তেওঁ কণ্ঠদান কৰে । এই সময়ছোৱাত অৰিজিতে বহুতো সন্মান আজুৰিবলৈও সক্ষম হয় । তথ্য অনুসৰি তেওঁ শ্ব’বোৰৰ বাবে একৰ পৰা ডেৰ কোটি টকা লয় । তেওঁৰ নেট ৱৰ্থৰ কথা ক’বলৈ গ’লে প্ৰায় ৭০ কোটি টকা বুলি কোৱা হয় ।
জীৱনত সফল হ'বলৈ কাৰনো মন নাযায় ৷ নিজৰ হাবিয়াস পূৰণত আমি কত কি ত্যাগ স্বীকাৰ কৰিবলগীয়া হয় ঠিক তেনেদৰেই নিজৰ সংগীত জীৱনত বহু ঘাট-প্ৰতিঘাত, সফলতা বিফলতা লাভ কৰা অৰিজিতেও নিজৰ অহোপুৰুষাৰ্থ চেষ্টাৰ ফলত আজি লাখ লাখ জনতাৰ হৃদয়ত নিজৰ এক বিশেষ স্থান দখল কৰিবলৈ সক্ষম হৈছে ৷
লগতে পঢ়ক : Oscars 2024 Date : ২০২৪ ৰ অস্কাৰ বঁটাৰ তাৰিখ ঘোষণা, জানি লওক কেতিয়া হ’ব অস্কাৰ ?
