চিটাৰা ডেস্ক, 5 নৱেম্বৰ: একচন ছবিৰ বাবে পৰিচিত ৰোহিত শ্বেট্টী অতি সোনকালে ঘূৰি আহিব এক বিস্ফোৰক একচন ভৰ্তি প্ৰজেক্ট লৈ । চিনেমাখনৰ নাম হৈছে ‘সিংঘম এগেইন’ ৷ এই ছবিখনত দেখা যাব একেলগে বহু তাৰকাক । ছবিখনত অজয় দেৱগনৰ উপৰিও খিলাড়ি কুমাৰক অৰ্থাৎ অক্ষয় কুমাৰকো একচন কৰা দেখা যাব । আজি মুক্তি পালে ছবিখনৰ পৰা অক্ষয় কুমাৰৰ ফাৰ্ষ্ট লুক । য’ত অক্ষয় কুমাৰক হেলিকপ্টাৰৰ পৰা জপিয়াই থকা দেখা গৈছে । তেওঁৰ দুয়ো হাততে দেখা গৈছে পিষ্টল ।
পোষ্টাৰখন শ্বেয়াৰ কৰি অক্ষয় কুমাৰে কেপচনত লিখিছে, ‘‘আইলা ৰে আইলা সূৰ্যবংশী আইলা... এই সময়চোৱা এ টি এছৰ মুৰব্বী সূৰ্যবংশীৰ আগমনৰ সময়, আপুনি সাজু নেকি ?’’ পোষ্টাৰখনত অক্ষয় কুমাৰে সিংঘম এগেইনৰ প্ৰথম লুক প্ৰকাশে কৰি ছবিখনৰ পৰিচালক ৰোহিত শেট্টী, অজয় দেৱগনক টেগ কৰিছে ।
এই পোষ্টাৰখন ছবিখনৰ মুখ্য অভিনেতা সিংঘম অজয় দেৱগনেও শ্বেয়াৰ কৰিছে । দেৱগনে এটা ধেমেলীয়া কেপচন দি লিখিছে, "বাধা দিয়াৰ পিচতো মোৰ বন্ধু সূৰ্যবংশী হেলিকপ্টাৰেৰে আহিছে ৷ "
ইফালে সিংঘম এগেইনৰ এই বিস্ফোৰক পোষ্টাৰখন দেখি অতিশয় উৎফুল্লিত হৈ পৰিছে অনুৰাগীসকল । দীৰ্ঘদিন ধৰি সামাজিক বিষয়ত ছবি নিৰ্মাণ কৰি অহা অক্ষয় কুমাৰক আকৌ এবাৰ একচন মোডত দেখাটো দৰ্শকৰ বাবে অতি আকৰ্ষণীয় হ’ব ।
অজয় দেৱগন, অক্ষয় কুমাৰৰ উপৰিও ৰণবীৰ সিঙেও ৰোহিত শ্বেট্টীৰ সিংঘম এগেইনত অভিনয় কৰিব । ইয়াৰ সমান্তৰালকৈ অভিনেত্ৰী কৰীণা কাপুৰকো এক গুৰুত্বপূৰ্ণ চৰিত্ৰত দেখা যাব । ইফালে 'সিংঘম এগেইন'ৰ দৃশ্যগ্ৰহণ শেষ হোৱাৰ পথত । সিংঘম (অজয়), সূৰ্যবংশী (অক্ষয়) আৰু চিম্বা (ৰণবীৰ) তিনিওজন অভিনেতা একত্ৰিত হোৱাৰ লগে লগে শেট্টীৰ আৰক্ষী বাহিনী আৰু ডাঙৰ হৈছে । ছবিখনত দীপিকা পাডুকনক ছাৰপ্ৰাইজ পেকেজ হিচাপেও দেখা যাব ।
লগতে পঢ়ক : Tiger 3 new promo: টাইগাৰ ৩ ৰ নতুন জোৰদাৰ প্ৰ’ম’ মুকলি, ভাইজানৰ ছবিখনে চেন্সৰ ব’ৰ্ডৰ পৰা পালে গ্ৰীণ চিগনেল
