ধুবুৰী,১৯ এপ্ৰিল: তৃতীয় পৰ্যায়ৰ নিৰ্বাচনলৈ মাজত মাত্ৰ দুটা দিন । ২৩ এপ্ৰিলত কোকৰাঝাৰ,গুৱাহাটী,বৰপেটা আৰু ধুবুৰীত অনুষ্ঠিত হ'ব ভোটগ্ৰহণ । এই নিৰ্বাচনৰ বাবে প্ৰচাৰ অভিযান চলাবলৈ শুকুৰবাৰে ধুবুৰীত উপস্থিত হয় পশ্চিমবংগৰ অভিনেত্ৰী নুস্ৰোত জাহান, ৰুণা খাতুন আৰু ৰাজ্য সভাৰ সাংসদ শান্তনু সেন । তৃণমূল কংগ্ৰেছৰ এই তিনিওগৰাকী হাই-প্ৰফাইল কেম্পেইনাৰে ধুবুৰীত উপস্থিত হৈ তৃণমূল কংগ্ৰেছৰ এক বিশাল ৰেলীত অংশগ্ৰহণ কৰে । ধুবুৰী সমষ্টিৰ তৃণমূলৰ প্ৰাৰ্থী নুৰুল ইছলাম চৌধুৰীৰ হৈ নিৰ্বাচনী প্ৰচাৰ চলাই অভিনেত্ৰী আৰু সাংসদগৰাকীয়ে । এই বৰ্ষৰ নিৰ্বাচনত তৃণমূল কংগ্ৰেছে পশ্চিমবংগৰ ৪২খন আসনৰ আটাইকেইখন আসন লাভ কৰাৰ বিপৰীতে অসমতো ভাল ফলাফল দেখুৱাবলৈ সক্ষম হ’ব বুলি উল্লেখ কৰে সাংসদ শান্তনু সেনে ।
আনহাতে, বাংলা ছবি জগতৰ জনপ্ৰিয় অভিনেত্ৰীগৰাকীয়ে তৃণমূল কংগ্ৰেছৰ জয় নিশ্চিত বুলি মন্তব্য কৰি জনসাধৰণৰ লগত সদায় তৃণমূল কংগ্ৰেছ থাকিব বুলি মত প্ৰকাশ কৰে । তাৎপৰ্যপূৰ্ণ ভাৱে, নিৰ্বাচনী প্ৰচাৰ সভাত অংশগ্ৰহণ কৰি নুস্ৰোত জাহানে অসমৰ মূল সমস্যা এন.আৰ.চি.বুলিও অভিহিত কৰে ।
