শিলচৰ, 13 এপ্ৰিলঃ দ্বিতীয় পৰ্যায়ৰ নিৰ্বাচনী প্ৰচাৰক লৈ উত্তাল হৈ আছে বৰাকৰ ৰাজনীতি ৷ শেহতীয়াকৈ নিৰ্বাচন সন্দৰ্ভত নিজৰ স্থিতি স্পষ্ট কৰিলে শিলচৰ লোকসভা সমষ্টিৰ সাংসদ তথা চলিত নিৰ্বাচনৰ সমষ্টিটোৰ কংগ্ৰেছী প্ৰাৰ্থী সুস্মিতা দেৱে ৷
ইটিভি ভাৰতৰ স্থানীয় সাংবাদিক দিলীপ কুমাৰ সিঙৰ সৈতে হোৱা বাৰ্তালাপত সুস্মিতা দেৱে কয় যে, "নিৰ্বাচনত কোনে জয়লাভ কৰিব কোনে হাৰিব সেইটো ৰাইজৰ ওপৰত নিৰ্ভৰ কৰে ৷ মোৰ ৰাইজৰ ওপৰত আত্মবিশ্বাস আছে যে, ভোট আমি পাম ৷ বিজেপিয়ে টকাৰ বলত নিৰ্ভৰ কৰিয়ে নিৰ্বাচন খেলি আছে ৷ নৰেন্দ্ৰ মোডীৰ সভালৈ টকা দি মানুহ অনা হৈছে ৷ নাগৰিকত্ব সংশোধনী বিধেয়কক লৈ বিজেপি দোধোৰ মোধোৰত পৰিছে ৷ ৰামনগৰৰ সভাত মোডীয়ে ইউ-টাৰ্ণ মাৰিলে, কিন্তু সেয়া ৰাইজে নিৰ্ণয় কৰিব ৷ আজি দেশৰ নিবনুৱা সমস্যা, কাছাৰ কাগজ কল, মূল্যবৃদ্ধি, জিএছটি, বিমুদ্ৰাকৰণ আদিৰ দ্বাৰা দেশৰ অৰ্থনীতিৰ যি লোকচান হৈছে সেয়া বহুত চিন্তনীয় বিষয় ৷ 40 লাখ লোকক বাদ দি যিসকল লোকৰ নাম এন আৰ চিত আহিছে, সেইসকল লোকে এইসমূহ সমস্যাৰ ওপৰত গুৰুত্ব দিব ৷ এগৰাকী সাধাৰণ লোকে নিজৰ সুৰক্ষা আৰু নিৰাপত্তাৰ প্ৰতি চিন্তা কৰিব ৷ বিজেপিয়ে হিন্দু-মুছলমান, মন্দিৰ-মছজিদ আদিৰ কথা কৈ ৰাইজক বিপথে পৰিচালনা কৰি আছে, কিয়নো বিজেপিৰ ওচৰত ৰাইজৰ সমস্যাৰ সমাধান নাই ৷ মোডীয়ে শিলচৰত দুবাৰ আহিছে, কিন্তু তেঁওৰেই মন্ত্ৰীয়ে কৈ আছে, ধুতীৰ ভোট নালাগে, লুঙ্গীৰ ভোট নালাগে, ইয়াৰ পৰাই সকলো কথা স্পষ্ট হৈ পৰিছে ৷ বিজেপি হৈছে মুছলমান বিৰোধী, বাঙালী বিৰোধী আৰু হিন্দু বিৰোধী, নিজৰ মাজতেই কথা সলনি কৰিছে প্ৰধানমন্ত্ৰীয়ে ৷ নাগৰিকত্ব সংশোধনী বিধেয়কক লৈ সংসদত এটা কথা আৰু অসমত আহি এটা কথা কৈছে মোডীয়ে ৷ ইয়াৰ সকলো বিচাৰ ৰাইজে কৰিব ৷"
আনহাতে অহা কালি অৰ্থাৎ দেওবাৰে অসমলৈ নিৰ্বাচনী প্ৰচাৰ চলাবলৈ আহিব প্ৰিয়ংকা গান্ধী ৷ এই কথা প্ৰকাশ কৰি সকলো ৰাইজকে প্ৰিয়ংকা গান্ধীৰ ৰোড শ্ব'ত অংশগ্ৰহণ কৰিবলৈ আহ্বান জনাই কংগ্ৰেছ দলৰ শক্তিশালী নেতৃগৰাকীয়ে ৷
