ডিফু, ২৫ মে': অবৈধ ড্ৰাগছৰ বিৰুদ্ধে অভিযান চলাই বৃহৎ সফলতা লাভ কৰিছে কাৰ্বি আংলং জিলাৰ বোকাজান মহকুমা আৰক্ষীয়ে ৷ প্ৰাপ্ত খবৰ অনুসৰি বোকাজান মহকুমাৰ বৰপথাৰ আৰক্ষীৰ নাকা তালাচীত জব্দ কৰে ৭২৩ গ্ৰাম ড্ৰাগছ ।
AS19 AC 0074 নম্বৰৰ বাছখনত ৬৪ টা চাবোনৰ বাকচত আনিছিল এই বৃহৎ পৰিমানৰ ড্ৰাগছখিনি । ঘটনাৰ সৈতে জড়িত ৰিম্পা হাজৰিকা নামৰ এগৰাকী মহিলাক (৪০)আটক কৰে বৰপথাৰ আৰক্ষীয়ে । দিনৰ প্ৰায় ১১:৩০ বজাত বাছ খনৰ তালাচীত জব্দ কৰা হয় ড্ৰাগছখিনি ।
অভিযানটোৰ নেতৃত্ব দিছিল বোকাজান মহকুমা আৰক্ষী বিষয়া জন দাস, বৰপথাৰ আৰক্ষী থানাৰ ভাৰপ্ৰাপ্ত আৰক্ষী বিষয়া ধ্ৰুৱজ্যোতি বৰা আৰু খটখটী আৰক্ষী থানাৰ আৰক্ষী বিষয়া চৰণ মোহন চেতিয়াই । ধৃত ড্ৰাগছ সৰবৰাহকাৰী ৰিম্পাৰ ঘৰ বোকাজানৰ খটখটিত বুলি জানিব পৰা গৈছে ।
আৰক্ষী সূত্ৰে জানিব পৰা অনুসৰি ড্ৰাগছ খিনি গুৱাহাটীলৈ লৈ গৈ তাত কোনো অজ্ঞাত লোকক দিয়াৰ কথা আছিল কিন্তু বোকাজান আৰক্ষীৰ হাতৰ পৰা সাৰি নগ’ল ড্ৰাগছ সৰবৰাহকাৰী আৰু ড্ৰাগছ খিনি । প্ৰত্যেক দিনাই অতি কৌশলগতভাৱে ড্ৰাগছ সৰবৰাহকাৰী চক্ৰই বোকাজানৰ মাজেৰে সৰবৰাহ কৰিবলৈ চেষ্টা কৰে আৰু যাক লৈ এতিয়া তৎপৰ হৈ পৰিছে বোকাজান মহকুমা আৰক্ষী ।
কাৰ্বি আংলং আৰক্ষীৰ কষ্ট আৰু একাগ্ৰতাৰ ফলত মণিপুৰ-নাগালেণ্ডৰ পৰা অসমত প্ৰৱেশ কৰা প্ৰত্যেক খন বাহন তন্ন তন্নকৈ পৰীক্ষা কৰাৰ বাবেই সম্ভৱ হৈছে এই বৃহৎ পৰিমাণৰ ড্ৰাগছ জব্দ কৰিবলৈ । উল্লেখ্য যে, জব্দকৃত ড্ৰাগছখিনিৰ বজাৰ মূল্য প্ৰায় 5 কোটি টকা হব বুলি জানিবলৈ দিয়ে আৰক্ষীয়ে ৷
লগতে পঢ়ক: ইণ্ডিয়া বুক অৱ ৰেকৰ্ডত নাম খোদিত বাইকাৰ বেদ প্ৰকাশৰ
