তিনিচুকীয়া, 3 মাৰ্চ : উজনি অসমত পুনৰ চলিছে উগ্ৰপন্থী বিৰোধী অভিযান । অৰুণাচল প্ৰদেশৰ পূব প্ৰান্তৰ ভাৰত-ম্যানমাৰৰ সীমান্তত ভাৰতীয় সেনা আৰু আৰক্ষীয়ে উগ্ৰপন্থীৰ সন্ধানত আৰম্ভ কৰিছে অভিযান । ম্যানমাৰৰ আলফা স্বাধীনৰ শিৱিৰৰ পৰা নামি অহা এটা সাতজনীয়া দলকলৈ উজনিৰ আৰক্ষী মহা পৰিদৰ্শক জিৎমল দলেৰ(Deputy Inspector General of Police Jitmal Doley) নেতৃত্বত দলটোৱে চলাই এই অভিযান ।
আনহাতে তিনিচুকীয়া আৰক্ষীয়ে দলটোৰ দুজন সদস্যই উজনিৰ আৰক্ষী মহা পৰিদৰ্শক জিৎমল দলেৰ ওচৰত আত্মসমৰ্পণ কৰাৰ তথ্য সদৰী কৰিছে(ULFA I Cadre Surrender in Tinsukia) । আত্মসমৰ্পণকাৰী আলফা সদস্য দুজন টিলকাই নেওগ ওৰফে ধনী অসম আৰু জাগৰণ অসম বুলি জানিব পৰা হৈছে ৷ টিলকাই নেওগ ওৰফে ধনী অসমৰ আত্মসমৰ্পণৰ পাছত ঘন জংঘলৰ মাজত ছেদেলি ভেদেলী হৈ গৈছিল দলটো ৷ ইয়াৰ পাছতেই আনজন আলফা সদস্য জাগৰণ অসমে আৰক্ষী মহা পৰিদৰ্শক জিৎমল দলেৰ ওচৰত আত্মসমৰ্পণ কৰাৰ কথা জানিব পৰা গৈছে ৷
জানিব পৰা মতে, আলফা স্বাধীনৰ এই দলটোত লগত আছিল কেপ্তেইন মিগাংক অসম, জ্ঞান অসম, ইয়াংকু অসম, জাগৰণ অসমৰ লগতে আন দুগৰাকী NSCN(KYA)ৰ সদস্য । টিলকাই নেওগ ওৰফে ধুনী অসমে আত্মসমৰ্পণৰ সময়ত এটা AK47 আৰু এটা হেণ্ড গ্ৰেণেড আৰক্ষীক জমা দিয়ে ৷ আনহাতে জাগৰণ অসমৰ পৰা আৰক্ষীয়ে এটা MQ 81 ৰাইফলসহ তিনিটা মেগজিন আৰু 148 জাই সজীৱ গুলী উদ্ধাৰ কৰে ৷ টিলকাই নেওগ ওৰফে ধনী অসমৰ ঘৰ তিনিচুকীয়া জিলাৰ কাকপথাৰৰ হাতীগড়ত বুলি জানিব পৰা গৈছে ৷
লগতে পঢ়ক : সাংসদ পল্লৱ লোচন দাসক ৰাজহুৱা স্থানত অপদস্থ
