শদিয়া, ৩১ মে': কাকপথাৰৰ বৰডুবি বাগানৰ নগেন নায়ক নামৰ ব্যক্তিজনৰ বাসগৃহত পুৱতি নিশা কোনো দুবৃৰ্ত্তই অগ্নিসংযোগ কৰাৰ ফলত কথমপি পৰিয়ালটোৰ প্ৰাণ ৰক্ষা পৰে ।
স্থানীয় আৰক্ষী থানাত খবৰ দিয়াৰ পাছতে আৰক্ষী আহি পৰিয়ালটোক উদ্ধাৰ কৰে আৰু সোধপোছৰ বাবে নগেন নায়কক আৰক্ষী থানালৈ মাতে । কিন্তু কেইবাগৰাকীও মহিলাই নায়কক থানালৈ যোৱাত বাধা দিয়াৰ বাবে আৰক্ষীয়ে তেওঁলোককো আটক কৰি থানালৈ লৈ যায় ।
নগেন নায়কে জানিবলৈ দিয়া অনুসৰি, কেইবাদিনৰ পৰা তেখেতৰ ওপৰত গাওঁবাসীয়ে অত্যাচাৰ কৰি অহাৰ লগতে গাওঁ এৰি যাবলৈ নিৰ্দেশ দি আহিছে ৷ কিয় তেওঁৰ ওপৰত গাওঁবাসীয়ে এনে অত্যাচাৰ চলাইছে সেই কথা প্ৰকাশ নকৰিলেও বিশাল কৰ্মকাৰ আৰু প্ৰদু কৰ্মকাৰ নামৰ দুজন লোকৰ নেতৃত্বত ঘটনাতো সংঘটিত হোৱা বুলি জানিবলৈ দিয়ে । অঞ্চলটোত তীব্ৰ চাঞ্চল্যৰ সৃষ্টি কৰা এই কাণ্ডৰ পাছতে সত্য পোহৰলৈ আনিবলৈ এতিয়া আৰক্ষীয়ে অনুসন্ধান অব্যাহত ৰাখিছে ।
