শদিয়া, 11 ছেপ্তেম্বৰ : তিনিচুকীয়া জিলাৰ কাকপথাৰত তিনিদিনীয়া কাৰ্যসূচীৰে অনুষ্ঠিত হোৱা কৰম সন্মিলনৰ সফল সামৰণি পৰে ৷ প্ৰথম দিনা পুৱা পতাকা উত্তোলন, শ্বহীদ তৰ্পনৰ পিছতেই বিভিন্ন প্ৰতিযোগিতা অনুষ্ঠিত কৰা হয় ৷ কাকপথাৰ সাংস্কৃতিক সংঘ প্ৰেক্ষাগৃহ প্ৰাঙ্গনত অনুষ্ঠিত হোৱা কৰম সন্মিলনৰ শেষৰ দিনা বিভিন্ন প্ৰতিযোগিতাৰ পাছতেই মুকলি সভা অনুষ্ঠিত হয় ৷ মুকলি সভাত বিভিন্ন জাতীয় - জনগোষ্ঠীয় সংগঠনৰ নেতৃবিন্দ, ৰাজনৈতিক নেতাই ভিৰ কৰা পৰিলক্ষিত হয় ৷ অতিজৰে পৰা চলি অহা আদিবাসী সকলৰ এই কৃষিভিত্তিক কৰম পৰ্বই অসমত বসবাস কৰা সকলো জাতি - জনগোষ্ঠীৰ মাজত একতাৰ বান্ধোন শক্তিশালী কৰে বুলি উল্লেখ কৰে উপস্থিত বক্তাসকলে ৷
লগতে চাহ জনগোষ্ঠীয়ে যেনেকৈ বিহুক আকোঁৱালী লৈছে তেনেকৈ কৰম পৰ্বকো সকলো জনগোষ্ঠীৰ লোকে আকোঁৱালি ল'লে অসমত বসবাস কৰা সকলো অসমীয়া একত্ৰিত হ'ব বুলি মত প্ৰকাশ কৰে উপস্থিত বক্তাসকলে ৷ সভাত আছু, যুৱ - ছাত্ৰ পৰিষদকে আদি কৰি কেইবাটাও জনগোষ্ঠীয় সংগঠনৰ বিষয়ববীয়াই অংশগ্ৰহণ কৰি চাহ জনগোষ্ঠীৰ লগত হাতে হাত মিলাই আগবাঢ়ি যোৱাৰ সংকল্প গ্ৰহণ কৰে ৷ মুকলি সভাৰ অন্ত পৰাৰ পাছতে বাৰেৰহনীয়া সাংস্কৃতিক অনুষ্ঠানৰ আয়োজন কৰা হয় ৷ তিনিওটা দিনৰ কাৰ্যসূচীত প্ৰায় দহ হাজাৰ লোকে অংশগ্ৰহণ কৰে বুলি জানিবলৈ দিয়ে উদ্যোক্তাসকলে ৷
