তিনিচুকীয়া, 14 জুন : এফালে প্ৰচন্দ জুইত নিজ ঘৰ-বাৰী হেৰুৱাই সৰ্বশ্ৰান্ত, সেই একে সময়তে আশ্ৰয় শিৱিৰত মাৰাত্মক কৰ'ণা সংক্ৰমণৰ ভয়াৱহতাত দিন কটাইছে বাঘজানৰ ক্ষতিগ্ৰস্ত পৰিয়ালবোৰে ৷ বাঘজানৰ তৈলখাদ বিস্ফোৰণত বেয়াকৈ ক্ষতিগ্ৰস্ত হৈ আশ্ৰয় শিৱিৰত থকা লোকসকলৰ স্বাস্থ্যক লৈ কিমান সজাগ অইল ইণ্ডিয়া কৰ্তৃপক্ষ তথা চৰকাৰ তাৰ বাবে আমি গৈ উপস্থিত হৈছিলো এক আশ্ৰয় শিৱিৰত ৷ কিন্তু আশ্ৰয় শিৱিৰৰ অৱস্থাত প্ৰত্যক্ষ কৰিলে নিশ্চয়কৈ ক'ব পাৰি যে, এইসকল ক্ষতিগ্ৰস্ত লোকক লৈ চৰকাৰ তথা অইল ইণ্ডিয়া কৰ্তৃপক্ষ তিলমাত্ৰও সচেতন তথা সজাগ নহয় ৷
বাঘজানৰ ভয়াৱহ জুয়ে সৰ্বশ্ৰান্ত কৰা পৰিয়ালক চৰকাৰে আশ্ৰয় শিবিৰত ৰাখিছে সঁচা, কিন্তু কৰ'ণা মহামাৰীৰ কথা ভাবি এই আশ্ৰয় শিৱিৰবোৰলৈ এবাৰ চালে আপোনাৰো দুখ আৰু ভয় লাগি উঠিব । পকী মজিয়াত চাৰি মহীয়া কেচুৱা শুই পৰিছে, একোটা কোঠাতে ইজনে সিজনৰ গাত লাগি বহি শুই দিন পাৰ কৰিছে এইসকল খিলঞ্জীয়াই ।
চৰকাৰী সজাগতাৰ বাৰ্তাই ঢুকি নোপোৱা এইসকল খাতি-খোৱা সহজ-সৰল লোকৰ মাজত কেনেবাকৈ যদি ভয়াৱহ কৰ'ণাৰ বীজানু বিয়পি পৰে তেন্তে পৰিস্থিতি কিমান ভয়াৱহ হ'ব পাৰে তাক কোনেও কম্পনা কৰিবও নোৱাৰিব ৷ এই শিৱিৰত যদিও চিকিৎসা সেৱাৰ আয়োজন কৰা হৈছে, কিন্তু প্ৰাথমিকভাৱে পৰীক্ষা কৰিয়েই সামৰা হৈছে দ্বায়িত্ব ।
তৈল খাদটোৰ জুইত ক্ষতিগ্ৰস্ত হৈ তিনিচুকীয়াৰ মুঠ 14 টা আশ্ৰয় শিৱিৰত থকা লোকৰ ক্ষেত্ৰত বৰ্তমানলৈকে নাই সামাজিক দূৰত্বৰ বাবে সজাগতাৰ কোনো ব্যৱস্থা । যাৰ বাবে যি কোনো মূহুৰ্ততে কৰ'ণা ভাইৰাছ বিয়পি পৰিব পাৰে । আশ্ৰয় শিৱিৰসমূহৰ অৱস্থাই এইসকল লোকৰ ক্ষেত্ৰত চৰকাৰ তথা অইল কৰ্তৃপক্ষৰ অৱহেলিত মনোভাৱ স্পষ্ট হৈ পৰে ।
আশ্ৰয়স্থলী অনাময়ৰ ক্ষেত্ৰতো দেখা নগ'ল কোনো সুচল ব্যৱস্থা । ইতিমধ্যেই এই আশ্ৰয় শিৱিৰ পৰিদৰ্শনৰ বাবে অহা নেতৃস্থানীয় লোকৰ ইয়াক লৈ আৰম্ভ হৈছে তীব্ৰ প্ৰতিক্ৰিয়া । কংগ্ৰেছী নেতা দূৰ্গা ভূমিজসহ জাতীয় সংগঠনৰ নেতাই এটা শিৱিৰ পৰিদৰ্শন কৰি লোকসকলক গৰু-ছাগলীৰ দৰে ৰখা হৈছে বুলি উল্লেখ কৰে ।
উল্লেখ যে, অভিযোগ অনুসৰি অইল ইণ্ডিয়াৰ বাবেই একপ্ৰকাৰ সকলো হেৰুৱাব লগা হোৱা এইসকল অসহায় লোকৰ ক্ষেত্ৰত এতিয়াও বৃহৎ অৰ্থ-সমৃদ্ধ প্ৰতিষ্ঠানটোৰ ভূমিকা এই শিবিৰবোৰলৈ চালেই স্পষ্ট হৈ পৰে ।
লগতে পঢ়কঃ বাঘজানত উপস্থিত হ'বলৈ সময় নাই মুখ্যমন্ত্ৰীৰ, লুৰিণৰ প্ৰতিক্ৰিয়া
